Tanda.enbek.kz-تە بوس جۇمىس ورىندار بويىنشا تۇراقتى تۇردە وڭىرلىك جارمەڭكەلەر وتەدى، دەپ حابارلايدى almaty-akshamy.kz.
Tanda.enbek.kz پورتالىندا وڭىرلىك مانساپ ورتالىقتارى ۇيىمداستىراتىن بوس جۇمىس ورىندارىنىڭ ونلاين-جارمەڭكەلەرىن وتكىزۋ مۇمكىندىگى ىسكە اسىرىلدى.
ونلاين-جارمەڭكەلەر بارىسىندا جۇمىس بەرۋشىلەرگە وزدەرىنە قاجەتتى مامانداردى ونلاين فورماتتا تابۋعا مۇمكىندىك بەرىلەدى. ءاربىر جۇمىس ىزدەپ جۇرگەن ادام ءوزىنىڭ تۇيىندەمەسىن جۇمىس بەرۋشىگە جىبەرىپ قانا قويماي، سونىمەن قاتار ونلاين-چات ارقىلى HR ماماندارىمەن ماسەلەلەردى تالقىلاپ، بەينە سۇحبات ارقىلى سۇحباتتاسا الادى.
جارمەڭكەگە قاتىسۋ ءۇشىن جۇمىس بەرۋشىلەر دە، ىزدەنۋشىلەر دە Tanda.enbek.kz پورتالىندا تىركەۋدەن ءوتۋى قاجەت.
ونلاين-جارمەڭكەلەر قازاقستاننىڭ بارلىق وڭىرلەرىندە وتەدى. تولىق اقپارات پەن جارمەڭكەلەردى وتكىزۋ كەستەسى Tanda.enbek.kz پورتالىندا جاريالانعان.
وسى ۋاقىتقا دەيىن Tanda.enbek.kz-تە ءارتۇرلى قىزمەت سالالارى ءۇشىن دە، جەكەلەگەن وڭىرلەر ءۇشىن دە ءبىرقاتار ونلاين-جارمەڭكەلەر وتكىزىلىپ، وعان جالپى 110 جۇمىس بەرۋشى مەن 3 مىڭنان استام ىزدەنۋشى قاتىستى.