ول وزىنە قىزمەتتە بولعان كەزدە بەرىلگەن مەملەكەتتىك ناگراداسىنان ايىرىلادى.
استانانىڭ مادەنيەت باسقارماسىنىڭ ەكس-باسشىسى بولات ماجاعۇلوۆقا سوت ۇكىمى شىقتى، دەپ حابارلايدى aqshamnews.kz
استانا قالاسىنىڭ قىلمىستىق ىستەر جونىندەگى اۋدانارالىق سوتىنىڭ سۋدياسى اسەل مۇقىشيەۆانىڭ ۇكىمى بويىنشا بولات ماجاعۇلوۆ تاعىلعان ايىپتار بويىنشا كىنالى دەپ تانىلىپ، 8 جىل 6 ايعا سوتتالدى.
بولات ماجاعۇلوۆ وتكەن جىلدىڭ قىركۇيەك ايىنىڭ باسىندا ۇستالدى. تەرگەۋدى قما (قارجى مونيتورينگى اگەنتتىگى) جۇرگىزدى. ەكس-شەنەۋنىككە ق ر قك 189-بابىنىڭ 4-بولىگى، 2-تارماعى بويىنشا («سەنىپ تاپسىرىلعان بوتەن مۇلىكتى يەمدەنۋ نەمەسە ىسىراپ ەتۋ») ايىپ تاعىلدى. تەرگەۋ نۇسقاسى بويىنشا، «سولنسە» سۋبۇرقاعىن سالۋ كەزىندە ءبىر ميللياردتان استام تەڭگە جىمقىرىلعان.
2016 جىلى ەلوردانىڭ تۋعان كۇنىنە وراي پايدالانۋعا بەرىلگەن «سولنسە» سۋبۇرقاعى ورتالىق ازياداعى ەڭ اۋقىمدى جوبا رەتىندە تانىستىرىلعان ەدى. 80 مەترگە دەيىن كوتەرىلەتىن سۋ اعىندارى جارقىن شوۋ جاساپ، ەلوردا تۇرعىندارى مەن قوناقتارىن قۋانتتى. الايدا 2019 جىلعا قاراي سۋبۇرقاق جارامسىز بولىپ، سۋ اعىندارىن بۇركۋىن توقتاتتى. قما مالىمدەۋىنشە، سۋبۇرقاق قۇرىلىسىندا ساپاسىز ماتەريالدار پايدالانىلىپ، مەملەكەتتىك ساتىپ الۋ راسىمدەرىن وتكىزبەستەن كەلىسىمشارتتارعا قول قويىلعان.