«بولاشاق» باعدارلاماسىنىڭ ۇمىتكەرلەرىنە قويىلاتىن تالاپتار كۇشەيتىلدى.
بيىلعى جىلدان باستاپ «بولاشاق» باعدارلاماسى ستيپەندياسىنىڭ ۇمىتكەرلەرىنە قويىلاتىن تالاپتار كۇشەيتىلدى. ەندى «بولاشاق» باعدارلاماسىنىڭ كونكۋرستىق ىرىكتەۋىنە قاتىسۋ ءۇشىن ۇمىتكەرلەر شەت ءتىلىن مەڭگەرگەنىن راستاۋى ءتيىس، دەپ حابارلايدى اlmaty-akshamy.kz.
كانديداتتار ءوتىنىم بەرگەن كەزدە، شەت تىلىنەن ەمتيحان تاپسىرعانى تۋرالى سەرتيفيكات ۇسىنادى. مىسالعا، اعىلشىن تىلىندە ماگيستراتۋراعا تۇسۋشىلەر ناتيجەسى 9.0-دەن كەم دەگەندە 6.0 IELTS، PBT 677- دەن 498، IBT 120- دان 60 TOEFL سەرتيفيكاتتارىن، تاعىلىمدامادان وتۋشىلەر - IELTS 5.0، PBT-417، IBT-35 TOEFL، DET 75 سەرتيفيكاتتارىن ۇسىنۋى ءتيىس.
«بيىل «بولاشاق» باعدارلاماسىنىڭ كونكۋرستىق ىرىكتەۋ ەرەجەلەرى جەتىلدىرىلدى. بۇل شارا كانديداتتاردىڭ قۇرامىن ساپالىق جاعىنان ارتتىرۋ ءۇشىن قابىلداندى. شەتەلدىك جوعارى وقۋ ورنىنىڭ دوكتورانتۋراسىنا تۇسەتىن قازاقستاندىقتاردى قوسپاعاندا، «بولاشاق» باعدارلاماسىنىڭ ۇمىتكەرلەرى شەت ءتىلىن مەڭگەرۋدىڭ جوعارى دەڭگەيىن راستاۋى قاجەت»، - دەپ اتاپ ءوتتى «حالىقارالىق باعدارلامالار ورتالىعى» اق باسقارما ءتوراعاسى ولجاس ساكەنوۆ.
ەستەرىڭىزگە سالا كەتەيىك، 2020 جىلدان باستاپ «بولاشاق» ستيپەندياسىن تاعايىنداۋ كونكۋرسىنا جەڭىلدىگى بار كانديداتتاردى قوسپاعاندا، جەتەكشى شەتەلدىك جوعارى وقۋ ورنىنان شارتسىز شاقىرۋى بار ۇمىتكەرلەر عانا قاتىسا الادى. سونىمەن قاتار ۆ1 جانە ودان جوعارى دەڭگەيى بار مەملەكەتتىك تىلدەن ەمتيحان تاپسىرعانى تۋرالى قازتەست سەرتيفيكاتىن ۇسىنۋ تالابى دا قويىلادى. بيىلعى جىلى «بولاشاق» باعدارلاماسى اياسىندا 555 ستيپەنديا ءبولىندى. ونىڭ ىشىندە 395 ستيپەنديا ماگيستراتۋرا/رەزيدەنتۋرا، 50 – دوكتورانتۋرا باعدارلامالارىنا ۇلەستىرىلگەن، سونداي-اق تاعىلىمدامادان ءوتۋ ءۇشىن 110 ستيپەنديا ءبولىندى.
ايتا كەتەيىك، قۇجات قابىلداۋ جانە كونكۋرستىق ىرىكتەۋ تولىعىمەن اۆتوماتتاندىرىلعان. بۇل حالىقارالىق ستيپەنديا تاعايىنداۋ كونكۋرسىنىڭ اشىقتىعىن قامتاماسىز ەتەدى. ۇمىتكەرلەر وڭىرلەردەن شىقپاي-اق ءوتىنىم بەرەدى جانە ىرىكتەۋدىڭ بارلىق كەزەڭدەرىنەن وتەدى.