باسەكەلەستىك وتە جوعارى بولعانى سونشالىق، ىرىكتەۋدە كىمنىڭ ازيا چەمپيوناتىنا باراتىنىن انىقتاۋ باپكەرلەرگە قيىنعا ءتۇستى. بۇل تۋرالى Almaty-akshamy.kz Inbusiness.kz-كە سىلتەمە جاساپ حابارلايدى.
ايەلدەردىڭ ءىزىن الا يوردانيا استاناسى امماندا وتەتىن بوكستان ازيا چەمپيوناتىندا ب ا ق سىنايتىن قازاقستان ەرلەر قۇراماسى بەلگىلى بولدى، دەپ حابارلايدى سپورتتى دامىتۋ ديرەكسياسىنىڭ باسپا ءسوز قىزمەتى.
قايرات ءساتجانوۆ شاكىرتتەرى الماتى وبلىسىنىڭ بايتەرەك اۋىلىنداعى ورتالىقتا وقۋ-جاتتىعۋ جيىنىن وتكىزىپ، شەشۋشى جەكپە-جەكتەرگە دايىندالدى. تۋرا 10 كۇنگە سوزىلعان دايىندىق 28-قازاندا اياقتالدى. وقۋ-جاتتىعۋ اياقتالا سالىسىمەن سول كۇنى-اق ۇلتتىق قۇرامامىز يوردانياعا اتتاندى.
"دايىندىق وتە جاقسى ءوتتى. ق ر مسم سپورت جانە دەنە شىنىقتىرۋ ىستەرى كوميتەتى، سپورتتى دامىتۋ ديرەكسياسى مەن قازاقستان بوكس فەدەراسياسىنىڭ ارقاسىندا باسەكە قارساڭىندا ەشقانداي قيىندىق بولعان جوق. بوكس ەلىمىزدە كەڭ تانىلعان، ۇنەمى جانكۇيەرلەر نازارىندا بولاتىن سپورت ءتۇرى. الدىڭعى قۇرلىق دوداسىنىڭ ناتيجەسىن قوعامنىڭ قالاي تالقىلاپ، سىنعا العانى ءالى ەسىمىزدە. دۋبايدا ەرلەر قۇراماسى التىنسىز قالعانىن بىلەسىزدەر. بيىل ءبىز ەسە قايتارعىمىز كەلەدى. ماقسات - جالپى ەسەپتە كوش باستاۋ"، - دەدى سپورتتى دامىتۋ ديرەكسياسىنا بەرگەن سۇحباتىندا باس باپكەر قايرات ءساتجانوۆ.
بوكستان XXXII ازيا چەمپيوناتى 30 قازان مەن 13 قاراشا ارالىعىندا وتپەك. ەرلەر 13، ال ايەلدەر 12 سالماقتا سىنعا تۇسەدى. سارى قۇرلىق دوداسىن ادەتتەگىدەي ازيا بوكس كونفەدەراسياسى (ASBC) حالىقارالىق بوكس قاۋىمداستىعىنىڭ (IBA) ەرەجەلەرىن نەگىزگە الا وتىرىپ ۇيىمداستىرادى.
امماندا جۇدىرىقتاساتىن بوكسشىلار ءتىزىمى: سانجار تاشكەنباي (48 كگ)، ساكەن بيبوسىنوۆ (51 كگ)، ماحمۇد سابىرحان (54 كگ)، سەرىك تەمىرجانوۆ (57 كگ)، ءساماتالى تولتايەۆ (60 كگ)، ءساناتالى تولتايەۆ (63،5 كگ)، دۋلات بەكباۋوۆ (67 كگ)، اسلانبەك شىمبەرگەنوۆ (71 كگ)، نۇرقانات رايىس (75 كگ)، نۇربەك ورالباي (80 كگ)، ساعىندىق توعانباي (86 كگ)، ايبەك ورالباي (92 كگ)، قامشىبەك قوڭقابايەۆ (+92 كگ).