بوكسشى فيرۋزا ءشارىپوۆا يرلاندىق قارسىلاسىنان جەڭىلىپ قالدى

فيرۋزا ابسوليۋت چەمپيونعا ون راۋند بويى ازۋلى قارسىلىق كورسەتە ءبىلدى

قازاقستاندىق بوكسشى فيرۋزا ءشارىپوۆا قارسىلاسىنان جەڭىلىپ قالدى، دەپ حابارلايدى Almaty-akshamy.kz قازاقپاراتقا سىلتەمە جاساپ.

Sports.kz رەسۋرسىنىڭ مالىمەتىنشە،  فيرۋزا ءشارىپوۆا مەن يرلاندىق كەتي تەيلور اراسىنداعى جەكپە-جەك بۇگىن ۇلىبريتانيانىڭ ليۆەرپۋل قالاسىندا وتكەن.

جەڭىل سالماقتاعى تيتۋلدىق كەزدەسۋ ون راۋندتقا شاقتالعان، ال جەڭگەن ادام تەيلوردىڭ WBC، WBO، WBA، IBF سەكىلدى الەم چەمپيونى تيتۋلدارىن يەلەنۋگە ءتيىس ەدى.

بۇل ايقاس ءادىلقازىنىڭ ءبىراۋىزدان شەشىمى بويىنشا تەيلوردىڭ جەڭىسىمەن اياقتالدى.

دەگەنمەن فيرۋزا ابسوليۋت چەمپيونعا ون راۋند بويى ازۋلى قارسىلىق كورسەتە ءبىلدى. تەك التىنشى راۋندتا عانا رەفەري ونىڭ ءبىر ۇپايىن الىپ قويدى.
وسىلايشا كەتي تەيلور ءوزىنىڭ كاسىبي سپورت جولىنداعى جيىرماسىنشى جەڭىسىنە قول جەتكىزىپ، بۇكىل تيتۋلدارىن، جەڭىل سالماقتاعى ابسوليۋت الەم چەمپيونى اتاعىن قورعاپ قالدى.

فيرۋزا ءشارىپوۆا كاسىپقوي بوكستا ەكىنشى رەت جەڭىلىس تاپتى.

ايتا كەتەيىك، قازاقستاندىق بوكسشى 2016 جىلدان بەرى ءبىر دە ءبىر مارتە جەڭىلگەن جوق ەدى.