زاڭ جوباسى ماقۇلداندى.
قازاقستاندىق بلوگەرلەر سالىق تولەۋگە مىندەتتەلەدى جانە جالعان اقپارات ءۇشىن جاڭا ايىپپۇل ەنگىزىلەدى، دەپ حابارلايدى Almaty-akshamy.kz
ءماجىلىس "ونلاين-پلاتفورمالار جانە ونلاين-جارناما تۋرالى" زاڭ جوباسىن ءبىرىنشى وقىلىمدا ماقۇلدادى.
زاڭ جوباسىنا پارلامەنت دەپۋتاتتارى باستاماشى بولعان. ءماجىلىس دەپۋتاتى ايدوس سارىمنىڭ ايتۋىنشا، زاڭ جوباسىندا ونلاين جارناما، ينفليۋەنسەر جانە جالعان اقپارات ۇعىمدارى ەنگىزىلگەن.
"وسى كەزگە دەيىن ءبىز ءداستۇرلى جارنامانى جاقسى بىلەمىز. تەلەديداردى قوسساق، ايقىن كورىپ وتىرامىز، گازەت-جۋرنالداردى اشساق تا، جارناما انىق كورىنىپ تۇرادى. ءبىزدىڭ ويىمىزشا، ازاماتتاردىڭ قۇقىعىن قورعاۋ ءۇشىن، ولار الدانباۋ ءۇشىن، ەرتەڭ قارجىلىق پيراميداعا تاپ بولماۋ ءۇشىن الەۋمەتتىك جەلىدەگى جارنامانى دا، دەمەۋشىلىك كونتەنتتى دە ايقىن كورسەتۋىمىز كەرەك. الەمدىك تاجىريبەدە بۇل بار. ول بلوگەرلەردەن، ينفليۋەنسەرلەردەن وسىنى تالاپ ەتەدى"، - دەدى سارىم ءماجىلىستىڭ جالپى وتىرىسىندا زاڭ جوباسىن تانىستىرىپ.
سونداي-اق ينتەرنەت ارقىلى تابىس تاباتىن بلوگەرلەر ەندى سالىق تولەۋگە مىندەتتەلەدى.
"شەتەلدىڭ ماقالى بار: كەز كەلگەن ادام ءولىم مەن سالىقتان قۇتىلا المايدى دەگەن. ولاي بولسا، ءبىزدىڭ زامانداستارىمىز دا، جۋرناليستەرىمىز دە ايتىپ وتىر: نەگە ءبىز بارلىعى ءۇشىن سالىق تولەيمىز، ال ينتەرنەتتە ميللياردتاپ، ميلليونداپ اقشا جيناپ جاتقان ازاماتتار مەملەكەتتىك قازىناعا ءبىر تيىن دا قۇيمايدى دەگەن ماسەلەنى قويىپ وتىر. وسى سەبەپتى ءبىز بلوگەر، ينفليۋەنسەر دەگەن ۇعىمدى ەنگىزدىك. وسى سەبەپتى دە جارنامانىڭ سان الۋان تۇرلەرىن زاڭعا بەكىتىپ، الداعى ۋاقىتتا مۇنىڭ بارلىعى، ەڭ الدىمەن كاسىپكەرلىك كودەكسكە جانە جىل سوڭىندا كەلەتىن سالىق كودەكسىنە ەنىپ، سۇر ەكونوميكادا جۇرگەن دۇنيەنىڭ بارلىعىن اشىق الاڭعا شىعارۋ، مەملەكەت قازىناسىن تولتىرۋعا پايدالانۋ قاجەت دەپ ەسەپتەيمىز"، - دەدى ماجىلىسمەن.
ونىڭ ايتۋىنشا، بۇگىندە جارنامانىڭ الپىس پايىزى ينتەرنەت سالاسىنا كەتىپ جاتىر. بۇل قازىرگى تاڭدا تريلليونداعان اقشا بولۋى ىقتيمال. زاڭ جوباسىنداعى تاعى ءبىر جاڭاشىلدىق – جالعان اقپارات ءۇشىن سالىناتىن ايىپپۇل.
"باستى ماسەلەنىڭ ءبىرى – ءبىز جالعان اقپارات دەگەن ۇعىمدى ەنگىزىپ وتىرمىز. بۇل ءبىزدىڭ زاڭنامانى جارتىلاي دەكريميناليزاسيالاۋ دەپ ەسەپتەيمىز، سەبەبى بارلىق ماسەلەنى سوت ارقىلى شەشۋ كەرەك جانە ونىڭ ىشىندە ايىپپۇلدار بولۋى كەرەك. ادام قاساقانا ەمەس، قاتەلەسىپ كەتسە، باسقا دا جاعداياتتار بولسا، جالعان اقپاراتى كوپ زيان تيگىزبەسە، وندا 20 اەك (69 000 تەڭگە) مولشەرىندە ايىپپۇل تولەيدى. ەگەر ءدال وسى ارەكەتتى قايتالاسا، ايىپپۇل ەكى ەسەلەنەدى. زاڭدى تۇلعالارعا دا وسىنداي ءتيىستى باسپالداق بار"، - دەپ ءتۇسىندىردى سارىم.
ءماجىلىس دەپۋتاتتارى اتالعان زاڭ جوباسىن ءبىرىنشى وقىلىمدا ماقۇلدادى.