شىمكەنتتە ستالكەردىڭ قولىنان قازا تاپقان ستۋدەنت قىزدىڭ وقيعاسىنا تاعى ءبىر جاڭا مالىمەت قوسىلدى، دەپ حابارلايدى aqshamnews.kz ءتلشىسى.
نۇرايدى پىشاقتاپ ولتىرگەن قىلمىسكەر شەرحان ايماحان بەلگىلى بلوگەر ماعجان ايماحاننىڭ تۋىسى ەكەن، ياعني بلوگەر تۋىستارى جازانىڭ جەڭىلدەۋىنە ىقپال ەتۋى مۇمكىن دەگەن اقپارات الەۋمەتتىك جەلىدە تاراپ كەتتى.
وسى تاراعان اقپاراتقا قاتىستى بلوگەر ماعجان ايماحان مەن ونىڭ كەلىنشەگى، بلوگەر كاميلا ءادىلحان ينستاگرام پاراقشاسىنا ۆيدەو-تۇسىنىكتەمە جاريالاپ، ەل الدىنا شىقتى.
"شىمكەنتتە بولعان نۇرايعا قاتىستى وقيعا بويىنشا شىعىپ تۇرمىز. ەڭ ءبىرىنشى، نۇرايدىڭ اتا-اناسىنا، تۋىستارىنا شىن جۇرەكتەن قايعىرىپ كوڭىل ايتامىز. اللا تاعالا جۇرەكتەرىڭىزگە تىنىشتىق بەرسىن، قازىرگى جاعدايلارىڭىزدى مەيىرىمدىلىكپەن جەڭىلدەتسىن!
بۇل - كەز كەلگەن اتا-انا ءۇشىن ورنى تولماس قايعى.
ەكىنشىدەن، شەرحان ايماحان - مەنىڭ اكەمنىڭ ءىنىسىنىڭ بالاسى، ءبىزدىڭ تۋىسىمىز. ەشكىم بالاسىنىڭ قاتىگەز، زۇلىم بولعانىن قالامايدى، ەش اتا-انا قىزىنىڭ اياق استى بىرەۋدىڭ قولىنان ءولىپ كەتكەنىن دە كۇتپەيدى، بۇل وقيعا وزىمىزگە دە اۋىر ءتيىپ تۇر. ەكى جاقتىڭ اتا-اناسىنا دا وتە اۋىر جاعداي، ەكى تاراپتىڭ دا قازىرگى جاعدايىن ادام بالاسىنا تىلەمەيمىز، مۇندايدان اللا ساقتاسىن!
كوپشىلىك بلوگەرمەن تۋىستىعى ادىلەتسىز شەشىمگە سەبەپ بولا ما دەپ جاتىر ەكەن، كەرىسىنشە ءبىز ەلدىڭ الدىندا جۇرگەن ادام رەتىندە قانشا تۋىسىمىز بولسا دا سوتتىڭ ءادىل شەشىمى شىققانىن، قىلمىسىنىڭ ءادىل جازاسىن العانىن قالايمىز.
بلوگەر عوي، "بۇيتەدى، سۇيتەدى" دەپ بايقاماي كۇنا ارقالاپ جۇرمەڭىزدەر، ءبىز ەڭ ءبىرىنشى اللانىڭ جازاسىنان قورقامىز، سول سەبەپتى بۇل قىلمىستى اقتاپ الاتىن ويىمىز جوق، بۇل وتە زۇلىمدىقپەن جاسالعان قىلمىس.
ءقازىر جامان ءسوز جازباي، نۇراي ءۇشىن دۇعا ەتەيىك، توپىراعى تورقا بولسىن، ال قىلمىس جاساعان ادام ءادىل جازاسىن السىن!"، دەدى ەرلى-زايىپتى بلوگەرلەر.