№50 مەكتەپ عيماراتىندا كۇردەلى جوندەۋ جانە تولىق سەيسميكالىق كۇشەيتۋ جۇمىستارى اياقتالدى. ءبىلىم بەرۋ ۇيىمى قاۋىپسىزدىك پەن جايلىلىقتىڭ زاماناۋي تالاپتارىنا تولىق ساي كەلدى. قازىرگى تاڭدا مەكتەپ وقۋشىلاردى قابىلداپ جاتىر. بۇل تۋرالى الماتى قالاسىنىڭ ءبىلىم باسقارماسىنىڭ وكىلدەرى ايتتى. مەكتەپ عيماراتى 1970 جىلى سالىنعان، ال سوڭعى رەت سەيسميكالىق كۇشەيتۋ جۇمىستارى 1996 جىلى جۇرگىزىلگەن. جوندەۋ بارىسىندا نەگىزگى قۇرىلىمدار كۇشەيتىلىپ، ىشكى بولمەلەر مەن ينجەنەرلىك جۇيەلەر تولىق جاڭارتىلدى.
«ءبىزدىڭ مەكتەپ ءۇشىن بۇل تەك جوندەۋ جۇمىستارىنىڭ اياقتالۋى عانا ەمەس، جاڭا كەزەڭنىڭ باستالۋىن بىلدىرەدى. 1970 جىلى سالىنعان عيمارات بۇگىندە قاۋىپسىزدىكتىڭ ەڭ قاتاڭ تالاپتارىنا جانە زاماناۋي ءبىلىم بەرۋ سۇرانىستارىنا تولىق ساي كەلەدى. ءبىز سەيسميكالىق كۇشەيتۋ ارقىلى بالالاردىڭ قاۋىپسىزدىگىن قامتاماسىز ەتىپ قانا قويماي، ولاردىڭ قىزىعۋشىلىقپەن وقىپ، جان-جاقتى دامۋىنا قولايلى ورتا قالىپتاستىرۋدى ماقسات ەتتىك. جاڭارتىلعان سىنىپتار، جاڭا ويىن جانە سپورت الاڭدارى — بۇل وقۋشىلارىمىزدىڭ بولاشاعىنا سالىنعان ينۆەستيسيا»، — دەدى №50 جالپى ءبىلىم بەرەتىن مەكتەپتىڭ ديرەكتورى ايدانا حاسەنوۆا.
ىشكى جۇمىستارمەن قاتار مەكتەپ اۋماعىندا كەشەندى كورىكتەندىرۋ جۇرگىزىلدى. وقۋ سىنىپتارى جابدىقتالىپ، قولدانىستاعى كابينەتتەر قايتا جاڭعىرتىلدى جانە قوسىمشا كابينەتتەر اشىلدى. سونىمەن بىرگە ەكى بالالار ويىن الاڭى سالىندى، فۋتبول جانە باسكەتبول الاڭدارى جابدىقتالدى، اۋماق اسفالتتالىپ، سىرتقى جارىقتاندىرۋدىڭ جاڭا تىرەكتەرى ورناتىلدى جانە كوگالداندىرۋ جۇمىستارى جۇرگىزىلدى.
«جوندەۋدەن كەيىن مەكتەپتىڭ قايتا اشىلۋىن اسىعا كۇتتىك. بارلىعى ويلاعانىمىزداي بولدى: سىنىپتار جارىق ءارى زاماناۋي، ال مەكتەپ اۋماعىندا سپورتپەن شۇعىلدانۋعا ارنالعان تاماشا الاڭدار پايدا بولدى. ەڭ باستىسى، سەيسميكالىق كۇشەيتۋ جۇمىستارىنىڭ ارقاسىندا بالالارىمىزدىڭ قاۋىپسىزدىگىنە دەگەن سەنىمىمىز ارتتى»، — دەدى مەكتەپتىڭ اتا-انالار كوميتەتىنىڭ وكىلى.