بجزق قانشا پايدا تاپتى؟

اعىمداعى جىلدىڭ ءبىرىنشى ايىندا بجزق سالىمشىلارىنىڭ شوتتارىنا 109،6 ملرد تەڭگەدەن اسا تازا ينۆەستيسيالىق كىرىس ەسەپتەلدى. بۇل وتكەن جىلدىڭ سايكەس كەزەڭىنىڭ كورسەتكىشتەرىنەن 45،7 ملرد تەڭگە نەمەسە 72% ارتىق، دەپ حابارلايدى اlmaty-akshamy.kz. 

2024 جىلدىڭ 1 اقپانىنداعى جاعداي بويىنشا سالىمشىلاردىڭ (الۋشىلاردىڭ) شوتتارىنا بولىنگەن بجزق زەينەتاقى اكتيۆتەرىنىڭ كىرىستىلىگى سوڭعى 12 ايدا 10،3% قۇرادى. بۇل كەزەڭدەگى ينفلياسيا 9،5% مولشەرىندە بولدى.

ينۆەستيسيالىق كىرىس قارجى قۇرالدارى (باعالى قاعازدار، سالىمدار جانە باسقا وپەراسيالار) بويىنشا سىياقى تۇرىندەگى كىرىستەردەن، قارجى قۇرالدارىن نارىقتىق جانە ۆاليۋتالىق قايتا باعالاۋدان، سىرتقى باسقارۋداعى اكتيۆتەر بويىنشا كىرىستەردەن جانە ت. ب. تۇرادى. ق ر ۇلتتىق بانكى جانە ينۆەستيسيالىق پورتفەلدى باسقارۋشىلار (يپب) زەينەتاقى اكتيۆتەرىن ينۆەستيسيالىق كىرىس الۋ ماقساتىندا قازاقستانداعى جانە شەتەلدەگى ەكونوميكانىڭ ءتۇرلى سەكتورلارىنىڭ ءار ءتۇرلى قارجى قۇرالدارىنا ءتۇرلى ۆاليۋتالاردا ورنالاستىرادى. ينۆەستيسيالىق پورتفەلدى ءارتاراپتاندىرۋ (ينۆەستيسيالاۋ قۇرالدارى مەن نارىقتارىنىڭ الۋان تۇرلىلىگى) زەينەتاقى جيناقتارىنىڭ ساقتالۋىن جانە ورنىقتى تابىستىلىعىن قامتاماسىز ەتەدى.

1998 جىلى جيناقتاۋشى زەينەتاقى جۇيەسى قۇرىلعان كۇننەن باستاپ ينۆەستيسيالىق كىرىس 2024 جىلعى 1 اقپاندا شامامەن9،5 ترلن تەڭگە بولدى. ال بۇكىل كەزەڭ ىشىندە جيناقتالعان ينفلياسيا 761،15% بولعاندا جيناقتالعان ينۆەستيسيالىق كىرىستىلىك وسپەلى قورىتىندىمەن 822،03% كورسەتتى. وسىلايشا، ۇزاق مەرزىمدى كەزەڭدەگى جيناقتالعان ينۆەستيسيالىق كىرىس ينفلياسيادان اسىپ ءتۇستى.

ەستەرىڭىزگە سالا كەتەيىك، قازاقستاندا ينفلياسيا دەڭگەيىن ەسكەرە وتىرىپ، مىندەتتى زەينەتاقى جارنالارىنىڭ ساقتالۋىنا بىرەگەي كەپىلدىك بار. ءتىپتى، سالىمشىنىڭ جيناقتالعان كىرىستىلىگىنە اسەر ەتكەن كىرىستىلىكتىڭ تومەندەۋى ورىن العان جەكەلەگەن كەزەڭدەر ءۇشىن دە مەملەكەت تولەم الۋ قۇقىعى باستالعان كەزدە ايىرماشىلىقتى وتەۋگە كەپىلدىك بەرەدى.  

زەينەتاقى اكتيۆتەرىن ينۆەستيسيالىق باسقارۋ مەن ەسەپكە الۋدىڭ بۇكىل جۇيەسى اشىق: ءاربىر سالىمشىنىڭ enpf.kz سايتىنداعى جەكە كابينەتىندە نەمەسە ۇيالى قوسىمشادا ءوزىنىڭ ينۆەستيسيالىق تابىسىن كورۋگە مۇمكىندىگى بار.

بجزق زەينەتاقى اكتيۆتەرىن ينۆەستيسيالىق باسقارۋ جانە ولار ورنالاستىرىلعان قارجى قۇرالدارى تۋرالى اقپارات قوردىڭ (www.enpf.kz) رەسمي سايتىنداعى «كورسەتكىشتەر/ينۆەستيسيالىق قىزمەت» بولىمىندە جاريالانادى.

كوپتەگەن ماڭىزدى جانە پايدالى اقپاراتتى، سونىڭ ىشىندە جيناقتاۋشى زەينەتاقى جۇيەسى ساراپشىلارىنىڭ زەينەتاقى اكتيۆتەرىن ينۆەستيسيالاۋ تۋرالى سۇحباتتى - بجزق ەنپف YouTube-ارناسىنان كورۋگە بولادى.