قازاقستاندىق كاسىپكەرلەر زارداپ شەككەن شاعىن جانە ورتا بيزنەس نىساندارىنا قارجىلاي كومەك كورسەتۋ ءۇشىن ارنايى قور قۇردى
وعان تاۋلىك ىشىندە 1 ميللياردقا جۋىق قاراجات جينالدى. بۇل تۋرالى الماتى قالاسى كاسىپكەرلەر پالاتاسى وڭىرلىك كەڭەسىنىڭ ءتوراعاسى ماكسيم بارىشيەۆ مالىمدەدى، دەپ حابارلايدى Almaty-akshamy.kz «حابار 24»-كە سىلتەمە جاساپ.
ونىڭ ايتۋىنشا، بارلىق قارجى وپەراسياسى سيفرلاندىرىلىپ، جۇرتقا جاريالانىپ وتىرادى. ال 30 كاسىپكەردەن تۇراتىن ارنايى كوميسسيا اقشانىڭ ءبولىنۋىن مۇقيات قاداعالايدى. بۇلىكتەن بيزنەسكە كەلگەن زالال 100 ميلليارد تەڭگەدەن استى. سوڭعى مالىمەتتەر بويىنشا، ءبىر جارىم مىڭنان استام كاسىپكەر شىعىنعا باتتى.
«زارداپ شەككەن كاسىپكەرلەر ينفوقازاقستان.كز سايتىنا كىرىپ، ءوتىنىش قالدىرا الادى. وندا كەلگەن شىعىن اۋقىمى مەن كولەمىن فوتو جانە ۆيدەودەرەكتەر ارقىلى تىركەۋ كەرەك. قورعا تۇسكەن قاراجات ارنايى كوميسسيانىڭ شەشىمىنەن كەيىن بولىنەدى»، - دەيدى الماتى قالالىق كاسىپكەرلەر پالاتاسى وڭىرلىك كەڭەسىنىڭ ءتوراعاسى ماكسيم بارىشيەۆ.