بيزنەسكە بەرىلەتىن وتەۋسىز گرانتتارعا ءوتىنىم قابىلداۋ باستالدى

العاشقى لەكتە 2 577 ادامعا گرانت بەرۋ جوسپارلانىپ وتىر.

قازاقستاندا 1،4 ملن تەڭگەنىڭ گرانتتارىنا ءوتىنىم قابىلداۋ باستالدى، دەپ حابارلايدى Almaty-akshamy.kz

مەملەكەتتىك گرانت جاڭا بيزنەستى ىسكە قوسۋ جانە دامىتۋ ءۇشىن وتەۋسىز بەرىلەدى.

"گرانتتار قاراجاتى ءىسىن جاڭا باستاعان كاسىپكەرلەرگە وزدەرىنىڭ بيزنەس-الەۋەتىن اشۋعا، ءوندىرىستى جولعا قويۋعا جانە دامىتۋعا، سول ارقىلى ءوزىن تۇراقتى تابىسپەن قامتاماسىز ەتۋگە مۇمكىندىك بەرەدى"، - دەيدى ەڭبەك جانە حالىقتى الەۋمەتتىك قورعاۋ مينيسترلىگىنىڭ ماماندارى.

وتىنىمدەر Business.enbek.kz پورتالىندا قابىلدانادى. گرانتتىڭ كولەمى - 400 اەك-تى (1 380 000 تەڭگە). ءار قاتىسۋشى ونى تەك ءبىر رەت الا الادى.

ءوتىنىم بەرۋ ءۇشىن:

- پورتالدا تىركەلۋ؛

- گرانت الۋ شارتتارىنا سايكەستىگىنە تەكسەرۋدەن ءوتۋ؛

- بيزنەس-جوسپار ۇلگىسىن جۇكتەپ الىپ، ونى تولتىرۋ جانە پورتالعا ەنگىزۋ؛

- ءوتىنىش نىسانىن تولتىرۋ جانە ەسق كىلتىمەن قول قويۋ قاجەت.

ينتەرنەت نەمەسە كومپيۋتەر بولماعان جاعدايدا، حالىقتى جۇمىسپەن قامتۋ ورتالىقتارىنىڭ وزىنە-وزى قىزمەت كورسەتۋ ايماقتارىندا، حالىققا قىزمەت كورسەتۋ ورتالىقتارىندا ءوتىنىم بەرۋگە بولادى. جاڭا بيزنەس-يدەيانى ىسكە اسىرۋعا مەملەكەتتىك گرانت الۋعا ۇمىتكەرلەر:

- تىركەلگەن جۇمىسسىزدار؛

- جەكە كاسىپكەرلەر (تىركەۋ مەرزىمى 3 جىلعا دەيىن)

- مۇگەدەكتىگى بار ادامدار؛

- قولدانىستاعى "قانداس" مارتەبەسى بار ادامدار؛

- ءوڭىرارالىق قونىس اۋدارۋشىلار

- از قامتىلعان وتباسى مۇشەلەرى؛

- كوپ بالالى وتباسى مۇشەسى (جۇبايى/زايىبى)؛

- مۇگەدەكتىگى بار بالانى تاربيەلەپ وتىرعان ادام (جۇبايى/زايىبى)؛

- اسىراۋشىسىنان ايىرىلۋ بويىنشا جاردەماقى الۋشىلار.

ۇمىتكەردىڭ "باستاۋ بيزنەس" جوباسى بويىنشا كاسىپكەرلىك نەگىزدەرىنە وقىتۋ تۋرالى 3 جىلدان اسپايتىن مەرزىمگە سەرتيفيكاتى بولۋعا ءتيىس.