ءقازىر الەمدە جۇرەك-قان تامىرلارى اۋرۋلارى ءولىمنىڭ نەگىزگى سەبەبىنىڭ بىرىنە اينالدى. ونىڭ كوپشىلىگى ءبىز ءجيى تۇسىنبەيتىن نە ەلەمەيتىن جامان ادەتتەرمەن بايلانىستى. الماتى قالالىق كارديولوگيالىق ورتالىعىنىڭ كارديولوگى اقنۇر ارىستانوۆا ءبىزدىڭ جۇرەگىمىزدى قانداي ادەتتەرمەن "ولتىرۋگە" بولاتىنىن جانە ولاردان قالاي ارىلۋعا بولاتىنىن ايتىپ بەردى.
ەڭ الدىمەن، ماماننىڭ باسا ايتقانى، بۇل تەمەكى شەگۋ. بۇل تەمەكى شەگۋ - جۇرەككە اسەر ەتەتىن ەڭ ءقاۋىپتى ادەتتىڭ ءبىرى.
"نيكوتين جانە تەمەكىدەگى باسقا زاتتار اتەروسكلەروز جانە ميوكارد ينفاركتىسى سياقتى جۇرەك اۋرۋلارىنىڭ دامۋ ءقاۋپىن ارتتىرادى. سوندىقتان تەمەكى شەگۋدەن باس تارتۋ - جۇرەگىڭىزدى قورعاۋدىڭ ەڭ جاقسى ءتاسىلىنىڭ ءبىرى"، - دەيدى اقنۇر ارىستانوۆا.
ودان كەيىن - دۇرىس تاماقتانباۋ. مايلاردى، قانتتى، تۇزدى جانە وڭدەلگەن تاعامدى شامادان تىس تۇتىنۋ سەمىزدىككە، قىسىمنىڭ جوعارىلاۋىنا جانە جۇرەككە ءقاۋىپ توندىرەتىن باسقا فاكتورلارعا اكەلۋى مۇمكىن. جۇرەك دەنساۋلىعىن ساقتاۋ ءۇشىن جەمىس، كوكونىس، ءداندى داقىلدار جانە مايسىز اقۋىزداردى كوبىرەك تۇتىنۋ ۇسىنىلادى.
ۇشىنشىدەن، بۇل ءجۇرىس-تۇرىسى از ءومىر سالتى. فيزيكالىق بەلسەندىلىكتىڭ بولماۋى جۇرەك-قان تامىرلارى اۋرۋلارىنىڭ دامۋ ىقتيمالدىعىن ارتتىرادى.
الكوگولدى شامادان تىس تۇتىنۋ جۇرەك دەنساۋلىعىنا دا كەرى اسەر ەتەدى. الكوگولدى كوپ مولشەردە ءىشۋ قان قىسىمىن، حولەستەريندى جوعارىلاتىپ، اريتميا مەن باسقا دا جۇرەك پروبلەمالارىنىڭ دامۋ ءقاۋپىن ارتتىرۋى مۇمكىن.
سترەسس پەن تۇراقتى شيەلەنىس جۇرەككە تەرىس اسەر ەتەدى، بۇل قىسىمنىڭ جوعارىلاۋىنا، جۇرەك سوعۋ جيىلىگىنىڭ جوعارىلاۋىنا جانە باسقا ماسەلەلەرگە اكەلەدى.
جالپى، جوعارىدا ايتىلعانداردىڭ ءبارىن ەسكەرە وتىرىپ، جۇرەكتىڭ دەنساۋلىعىن ساقتاۋ ءۇشىن جامان ادەتتەردەن اۋلاق بولۋ جانە سالاۋاتتى ءومىر سالتىن ۇستانۋ قاجەت. تۇراقتى مەديسينالىق تەكسەرۋلەر، دۇرىس تاماقتانۋ، فيزيكالىق بەلسەندىلىك جانە تەمەكى شەگۋدەن باس تارتۋ جۇرەك-قان تامىرلارى اۋرۋلارىنىڭ ءقاۋپىن ازايتۋعا جانە كوپ جىل بويى دەنساۋلىقتى ساقتاۋعا كومەكتەسەدى.