الماتىدا ماڭدايشالار مەن سىرتقى جارنامانى قالانىڭ ديزاين-كودىنا سايكەستەندىرۋ جۇمىستارى باستالدى
الماتى قالالىق جوسپارلاۋ جانە ۋربانيستيكا باسقارماسى قالانىڭ ديزاين-كودىنا سايكەس كەلمەيتىن ماڭدايشالار مەن پلاكات باننەرلەرىن بولشەكتەۋدى باستادى، دەپ حابارلايدى almaty-akshamy.kz
الماتىنىڭ ديزاين-كودى 2023 جىلعى 29 جەلتوقساندا قابىلدانىپ، اعىمداعى جىلدىڭ ناۋرىز ايىندا كۇشىنە ەندى. ونىڭ 7 باعىتىنىڭ ءبىرى ءار ءتۇرلى اقپارات قۇرالدارىن بەزەندىرۋگە جانە تولتىرۋعا، سونداي-اق ولار ورنالاسقان وبەكتىلەردى بەزەندىرۋگە قويىلاتىن تالاپتاردى انىقتايدى.
قالالىق جوسپارلاۋ جانە ۋربانيستيكا باسقارماسىنىڭ قىزمەتكەرلەرى بيزنەس وكىلدەرى اراسىندا جەرگىلىكتى جەردىڭ ساۋلەت ءانسامبلىن ۇستانۋ قاجەتتىگى تۋرالى ءتۇسىندىرۋ جۇمىستارىن جۇرگىزۋدە. ياعني، كەز-كەلگەن سىرتقى اقپارات عيماراتتىڭ ارحيتەكتۋراسىن قابىلداۋدىڭ تۇتاستىعىن بۇزباۋى كەرەك، ال عيماراتتاردىڭ ءبىرىنشى قاباتتارىنىڭ تۇستەرى مەن ارلەۋ ماتەريالدارى قاسبەتتەردىڭ ارحيتەكتۋرالىق ستيلىنە سايكەس كەلۋى ءتيىس.
«مەنشىك يەلەرىنە زاڭسىز جارنامانى بولشەكتەۋ تۋرالى حابارلاما بەرىلەدى. بۇل پروسەسس قالالىق ورتانىڭ ەستەتيكاسىن جاقسارتۋعا عانا ەمەس، سونىمەن قاتار قالا كوشەلەرىندەگى ۆيزۋالدى دىبىستى ازايتۋعا ارنالعان. جۇرتشىلىقپەن جانە كاسىپكەرلەرمەن بىرلەسە وتىرىپ، ءبىز قالامىزدىڭ جاڭا كەلبەتىن جاسايمىز»، - دەپ اتاپ ءوتتى قالا قۇرىلىسى جانە ۋربانيستيكا باسقارماسى.
ايتا كەتەرلىگى، مەگاپوليس اكىمى ەربولات دوسايەۆتىڭ تاپسىرماسىنا سايكەس ديزاين-كود كەزەڭ-كەزەڭىمەن ەنگىزىلۋدە. قولدانىستاعى نىساندارعا كاسىپكەرلەردى ديزاين-كود قاعيداتتارىن ءوز ەركىمەن جانە بەلسەندى تۇردە ەنگىزۋگە ىنتالاندىرۋ ءۇشىن كەشەندى ءتاسىل قاراستىرىلعان. جاڭا نىساندار ءۇشىن ۇسىنىستار مەن تالاپتاردىڭ تولىق كولەمى قولدانىلادى.
ەستەرىڭىزگە سالا كەتەيىك، «الماتى – ءبىزدىڭ ورتاق ءۇيىمىز» اكسياسى اياسىندا وتكەن اپتادا قالادا قالا كەلبەتىن رەتكە كەلتىرۋ بويىنشا جۇمىستار جۇرگىزىلدى. ايالدامالاردى، باعدارشامداردى، ورىندىقتاردى، ۋرنالاردى جانە كوشە-جول جەلىسىنىڭ باسقا دا ەلەمەنتتەرىن جۋۋ مەن سىرلاۋدان باسقا، اۋدان اكىمدىكتەرى رۇقسات ەتىلمەگەن جارنامانى جويا باستادى.