جاڭا وندىرىستەر مەن جۇمىس ورىندارىن اشقان اكتيۆ يەلەرى ەشقانداي پروبلەماعا تاپ بولمايدى. مەملەكەت باسشىسى قاسىم-جومارت توقايەۆ ۇكىمەتتىڭ كەڭەيتىلگەن كەڭەسىندە وسىنداي مالىمەت ايتتى، دەپ حابارلايدى almaty-akshamy.kz
«بارلىق قاراجات تولىعىمەن ەكونوميكانى دامىتۋعا جۇمسالۋى قاجەت. وسى ورايدا قارجىنى قايتارىپ، ەلىمىزدى وركەندەتۋگە اتسالىسقىسى كەلەتىن ازاماتتارعا مىنانى ايتقىم كەلەدى. جاڭا يندۋستريالىق جوبالارعا قارجى سالىڭىزدار»، - دەدى قاسىم-جومارت توقايەۆ.
پرەزيدەنتتىڭ ايتۋىنشا، مۇنداي اكتيۆ يەلەرى مەملەكەتتىڭ وڭ نازارىندا بولماق.
«قازاقستاندا جاڭا وندىرىستەر اشىپ، جاڭا جۇمىس ورىندارىن قۇرىڭىزدار. سوندا مۇنداي اكتيۆتەرگە جانە ونىڭ يەلەرىنە قاتىستى ەشقانداي ماسەلە تۋىندامايدى. تاعى دا قايتالاپ ايتامىن. ءبىز ادال ءارى اشىق جۇمىس ىستەيتىن بيزنەس وكىلدەرىنە بارلىق جاعدايدى جاسايمىز»، – دەدى مەملەكەت باسشىسى.