ۇلتتىق تەستىلەۋ ورتالىعىنىڭ ديرەكتورى رۋسلان ەمەلبايەۆ ۇبت تاپسىرۋشىلارعا ۇندەۋ تاستادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ستاتيستيكا بويىنشا جىل سايىن ۇبت-داعى ەرەجە بۇزۋشىلاردىڭ سانى ازايىپ كەلە جاتىر. ماسەلەن، 2019 جىلى تەستىلەۋگە كىرگىزۋ بارىسىندا 128 مىڭ، 2020 جىلى – 2 522، 2021 جىلى – 756، 2022 جىلى – 327 تىيىم سالىنعان زات انىقتالدى. ياعني، كورسەتكىش 400 ەسە ازايعان. بۇل تالاپكەرلەردىڭ بۇگىندە ءوز بىلىمدەرىنە سەنىپ، اكادەميالىق ادالدىق ەرەجەلەرىمەن جاقسى تانىس ەكەنىن كورسەتەدى»، - دەپ جازدى ول Instagram پاراقشاسىندا.
سونداي-اق، ول «شپارگالكا» پايدالانۋشىلار سانى ازايعانىمەن، مۇلدەم جويىلىپ كەتپەگەنىن ايتادى.
«بيىلعى ۇبت-نىڭ 5 اپتاسى بويىنشا انىقتالعان ەڭ كرەاتيۆتى «تاسىلدەردى» وسى جازبادا ۇسىنىپ وتىرمىن. تالاپكەرلەردىڭ، وكىنىشىنە قاراي، ءبىزدىڭ قىراعى باقىلاۋشىلاردى الداۋى مۇمكىن بولمادى. بالالاردىڭ ەرەكشە شىعارماشىلىق جۇمىستارى بىردەن انىقتالدى. تەستىلەۋ ەرەجەلەرىن بۇزۋ تۋرالى بىزگە كەلىپ تۇسكەن ءاربىر ءوتىنىش قاراستىرىلادى. ەستەرىڭىزدە بولسا، بىلتىر پوستمونيتورينگ قورىتىندىسى بويىنشا 200-دەن استام ادامنىڭ تەست ناتيجەسىن جويدىق. ونىڭ ىشىندە 137ء-ى گرانت يەگەرى بولعان. بيىل دا بۇل جۇمىس ءوز جالعاسىن تابادى.
بيىلعى ۇبت-نىڭ اياقتالۋىنا 2 اپتا قالدى. تالاپكەرلەردى اكادەميالىق ادالدىق پرينسيپتەرىن ساقتاۋعا شاقىرامىن. جەتىستىككە جەتۋدىڭ باستى شارتى ءبىلىمدى بولۋ ەكەنىن ۇمىتپاڭىزدار»، - دەدى رۋسلان ەمەلبايەۆ.