باتىپ بارا جاتقان 131 ادام قۇتقارىلعان، ولاردىڭ 35ء-ى – بالالار.
ەلىمىزدە شومىلۋ ماۋسىمى باستالعالى 70 ادام، ونىڭ ىشىندە 30 بالا سۋعا باتىپ كەتتى، دەپ حابارلايدى Almaty-akshamy.kz
تجم ازاماتتىق قورعانىس جانە اسكەري بولىمدەر كوميتەتى ءتوراعاسىنىڭ ورىنباسارى اقىلبەك احمەتجانوۆتىڭ ايتۋىنشا، بىلتىر وسى كەزەڭدە 83 ەرەسەك جانە 23 بالا سۋعا كەتكەن.
كوميتەت ءتوراعاسى ورىنباسارىنىڭ دەرەگىندە، سۋعا باتىپ كەتكەندەردىڭ 85 پايىزى بەلگىلەنبەگەن، جابدىقتالماعان، رۇقسات ەتىلمەگەن جەرلەردە سۋعا تۇسكەن. قالعان 15 پايىز وقيعا الماتى، ماڭعىستاۋ، اباي، اقتوبە، پاۆلودار وبلىستارىنداعى رۇقسات ەتىلگەن شومىلۋ ورىندارىندا بولعان.
“وزدەرىڭىز بەن جاقىندارىڭىزدىڭ ءومىرىن ساقتاۋ ءۇشىن رۇقسات ەتىلگەن، ءقاۋىپسىز جەرلەردە سۋعا ءتۇسۋ كەرەك ەكەنىن ەسكە سالامىز. رۇقسات ەتىلگەن ورىندار تۋرالى دەرەكتەر ب ا ق بەتتەرىندە، اكىمدىك سايتتارىندا، ايماقتىق دەپارتامەنتتەردە بار. ەلدە ازاماتتار جۇزۋگە، بالىق اۋلاۋعا باراتىن 85 مىڭنان استام وزەن، 48 مىڭ كول بار. بۇقارالىق دەمالىسقا ارنالعان 708 ورىن بەكىتىلگەن. ولاردىڭ 167ء-ى كوممۋنالدىق، 425ء-ى جەكەمەنشىك جاعاجايلار. قالعان 116-سى سپورت پەن تۋريزمگە ارنالعان”، – دەدى احمەتجانوۆ.