بيىل قازاقستاندا اۋىل شارۋاشىلىعى ماشينالارىن جاساۋ سەكتورىندا 3 جاڭا ءوندىرىس ىسكە قوسىلدى.
ولاردىڭ جالپى قۇنى - 5،7 ملرد تەڭگەنى قۇرايدى، دەپ حابارلايدى aqshamnews.kz.
ونەكاسىپ جانە قۇرىلىس مينيسترلىگىنىڭ مالىمەتىنشە، جوبالاردى ىسكە اسىرۋ 172 تۇراقتى جۇمىس ورنىن قۇرۋعا مۇمكىندىك بەردى. بۇل تۋرالى «QazIndustry» قازاقستاندىق يندۋستريا جانە ەكسپورت ورتالىعىنىڭ جوبالاردى ىسكە اسىرۋعا مونيتورينگ جۇرگىزۋ جانە تالداۋ ديرەكسياسى حابارلادى.
«كاسىپورىندار وزدىگىنەن جۇرەتىن اۋىل شارۋاشىلىعى ماشينالارىن، تىركەمە جانە اسپالى تەحنيكانى، جاڭبىرلاتىپ سۋارۋ جابدىقتارىن، تەرەڭ قوپسىتقىشتاردى جانە باسقا دا تەحنيكانى شىعارا باستادى. ونىمدەردىڭ باسىم بولىگى ەلدىڭ ىشكى قاجەتتىلىكتەرىن قامتاماسىز ەتۋگە باعىتتالعان»، - دەلىنگەن حابارلامادا.
ىسكە قوسىلعان اتالمىش جوبالار تولىق قۋاتتىلىققا شىققاندا، وندىرىلگەن ءونىم كولەمى 107،3 ميلليارد تەڭگەگە جەتۋى مۇمكىن دەپ بولجانۋدا.
ديرەكسيانىڭ مالىمەتىنشە، جالپى اۋىل شارۋاشىلىعى ماشيناسىن جاساۋ سالاسىنداعى ينۆەستيسيالىق پورتفەل 26 ميلليارد تەڭگەنى قۇرايتىن 10 جوبانى قامتيدى. ولاردى جۇزەگە اسىرۋ 700-دەن استام جۇمىس ورنىن قۇرۋدى كوزدەيدى.
قازىرگى ۋاقىتتا 18،4 ملرد تەڭگەنى قۇرايتىن بەس جوبا ىسكە اسىرىلۋ ساتىسىندا، ولار 510-نان استام جۇمىس ورنىمەن قامتاماسىز ەتەدى. جوبالار اياسىندا كومبايندار، تراكتورلار، اۋىر تىرمالار، استىق تاسىمالداۋعا ارنالعان كولىكتەر جانە باسقا دا تەحنيكا وندىرىلمەك. وندىرىلگەن ونىمدەردىڭ باسىم بولىگى ىشكى نارىققا باعىتتالاتىن بولادى.
«بۇدان بولەك، شامامەن 2 ملرد تەڭگە قۇرايتىن تاعى ەكى جوبا قاراستىرىلۋدا. وتاندىق ينۆەستورلارمەن بىرلەسىپ، اۋىل شارۋاشىلىعى تەحنيكالارىنىڭ ءارتۇرلى تۇرلەرىن ءوندىرۋ جانە تەحنيكالاردى جوندەۋ مەن قىزمەت كورسەتۋ ورتالىعىن ىسكە قوسۋ جوسپارلانۋدا»، – دەپ ناقتىلادى ديرەكسيادا.
سونىمەن قاتار، سالاعا ينۆەستيسيالار تارتۋ ماقساتىندا رەسپۋبليكالىق جانە جەرگىلىكتى دەڭگەيدە ارنايى ەكونوميكالىق ايماقتار اياسىندا ينۆەستيسيالىق پرەفەرەنسيالار، جەڭىلدەتىلگەن نەسيە شارتتارى، سالىقتىق جەڭىلدىكتەر سياقتى قولداۋ شارالارى كورسەتىلۋدە.