بالىق شارۋاشىلىعى سالاسىنىڭ دامۋ نۇكتەسى - بالىق ءوسىرۋ.
بيىل قازاقستاندا 42 مىڭ توننادان استام بالىق اۋلاندى. بۇل تۋرالى ۇكىمەت وتىرىسىندا ق ر ەكولوگيا، گەولوگيا جانە تابيعي رەسۋرستار ءمينيسترى سەرىكقالي برەكەشيەۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«بالىق ءوسىرۋ - ەكونوميكا ءوسىمى مەن جۇمىسپەن قامتۋدا ماڭىزدى سالالاردىڭ ءبىرى. بالىق شارۋاشىلىعىندا نەگىزگى ەكى باعىتتاعى قىزمەت بار – بالىق اۋلاۋ جانە بالىق ءوسىرۋ. بيىل 10 ايداعى بالىق شارۋاشىلىعىنىڭ قۇرىلىمى مىناداي: اۋلانعانى – 42،6 مىڭ توننا، وسىرىلگەنى – 14،1 مىڭ توننا، ەكسپورت – 16 مىڭ توننا، يمپورت – 32 مىڭ توننا. بالىق شارۋاشىلىعى سالاسىنىڭ دامۋ نۇكتەسى - بالىق ءوسىرۋ. بىلتىر ساۋىردە ۇكىمەت بالىق سالاسىن دامىتۋ باعدارلاماسىن قابىلدادى»، - دەدى ول.
ءمينيستردىڭ ايتۋىنشا، اتالعان باعدارلامانى ىسكە اسىرۋ ناتيجەسىندە 2030 جىلعا دەيىن بالىق ءوسىرۋدى 270 مىڭ تونناعا، بالىق ونىمدەرىن ىشكى تۇتىنۋدى 134 مىڭ تونناعا ۇلعايتۋ، يمپورت كولەمىن 45 مىڭ توننادان 25 مىڭ تونناعا دەيىن ازايتۋ جوسپارلانىپ وتىر.
«كورسەتىلگەن ينديكاتورلارعا قول جەتكىزۋ ءۇشىن بيزنەسقا قولايلى جاعداي جاسالىپ وتىر. ءبىرىنشى، وندىرىستىك جانە ينۆەستيسيالىق شىعىنداردى سۋبسيديالاۋ ارقىلى مەملەكەتتىك قولداۋ شارالارى كەڭەيتىلدى. ەكىنشى، سۋ ايدىندارىن بالىق اۋلاۋ شارۋاشىلىعىنان بالىق وسىرۋگە اۋىستىرۋ جەڭىلدەتىلدى. ءۇشىنشى، بالىق ءوسىرۋ شارۋاشىلىعى ءۇشىن سۋ قورعاۋ بەلدەۋىندە جەر بەرۋدىڭ شەكتەۋلەرى الىنىپ تاستالدى. ءتورتىنشى، جوبالاۋ-سمەتالىق قۇجات، مەملەكەتتىك ساراپتاما سياقتى كەدەرگىلەر الىنىپ تاستالىپ، تەك ەسكيزدىك جوبا نەگىزىندە بالىق ءوسىرۋ توعاندارىن سالۋعا مۇمكىندىك بەرىلدى»، - دەدى سەرىكقالي برەكەشيەۆ.