2022 جىلى 87،5 ملن توننا مۇناي وندىرىلەدى.
قازاقستان ۇكىمەتى ۇستىمىزدەگى جىلى 69 ملن توننا مۇنايدى ەكسپورتقا شىعارۋدى جوسپارلاپ وتىر. بۇل تۋرالى قازاقستاننىڭ ەنەرگەتيكا ءمينيسترى بولات اقشولاقوۆ ايتتى، دەپ حابارلايدى Almaty-akshamy.kz.
«2021 جىلدىڭ قورىتىندىسى بويىنشا مۇناي ءوندىرۋ كولەمى 85،9 ملن توننانى، مۇناي ەكسپورتى 67،6 ملن توننانى قۇرادى. مۇناي ءوندىرۋدىڭ 2022 جىلعا ارنالعان جوسپارى - 87،5 ملن توننا، ەكسپورت بويىنشا - 69 ملن توننا. تەڭىز، قاراشىعاناق جانە قاشاعان ءۇش ءىرى مۇناي-گاز جوباسى ەلىمىزدىڭ مۇناي ءوندىرۋ كوشباسشىلارى بولىپ قالۋدا»، - دەدى ول مينيسترلىكتىڭ كەڭەيتىلگەن القا وتىرىسىندا.
ونىڭ اتاپ وتۋىنشە، تەڭىز جوباسىندا 2021 جىلى مۇناي ءوندىرۋ 26،5 ملن توننانى، گاز ءوندىرۋ كولەمى 14،5 ملرد تەكشە مەتردى قۇرادى.
«كەن ورنىندا قۇنى 45،2 ملرد اقش دوللارىن قۇرايتىن، كەلەشەكتە كەڭەيتۋ جوباسى ىسكە اسىرىلۋدا. بۇل مۇناي ءوندىرۋدى جىلىنا 12 ملن تونناعا ۇلعايتۋعا مۇمكىندىك بەرەدى. 2021 جىلدىڭ قورىتىندىسىنا سايكەس، جوبا بويىنشا جۇمىستاردىڭ جالپى ىلگەرىلەۋى 89 پايىزدى، 2022 جىلعا ارنالعان جوسپار 97،4 پايىزدى قۇرادى. جوبانى 2023 جىلى اياقتاۋ جوسپارلانىپ وتىر»، - دەدى مينيستر.
بولات اقشولاقوۆتىڭ ايتۋىنشا، 2021 جىلدىڭ قورىتىندىسىندا قاشاعاندا مۇناي ءوندىرۋ كولەمى 16،2 ملن توننا، ال گاز ءوندىرۋ كولەمى 9،8 ملرد تەكشە مەتر بولدى.
«وتكەن جىلى قۋاتى 1 ملرد تەكشە بولاتىن گاز وڭدەۋ زاۋىتىنىڭ قۇرىلىسى باستالدى. 2022 جىلى وسى گاز وڭدەۋ زاۋىتىنىڭ قۇرىلىس-مونتاجداۋ جۇمىستارىندا 40 پايىز پروگرەسكە قول جەتكىزۋ جوسپارلانىپ وتىر. تولىق قۋاتقا شىققان كەزدە زاۋىت 800 ملن تەكشە كولەمىندە تاۋارلىق گاز، 119 مىڭ توننا كولەمىندە سۇيىتىلعان گاز وندىرەتىن بولادى. سونىمەن قاتار قۋاتى جىلىنا 2 ملرد تەكشە مەتر قاشاعان گاز وڭدەۋ زاۋىتى جوباسىن ىسكە اسىرۋ جوسپارلانۋدا»، - دەگەن ول.
وسى ورايدا مينيستر ءبىرىنشى ۆيسە-مينيستر مۇرات جورەبەكوۆكە وسى جىلى بازالىق جوبالاۋدى باستاۋ جونىندە تاپسىرما بەردى.
«قاراشىعاناقتا 11،5 ملن توننا كولەمىندە مۇناي، 18،9 ملرد تەكشە مەتر كولەمىندە گاز ءوندىرىلدى. بۇگىنگى كۇنى كەن ورنىندا سۇيىق كومىرسۋتەكتەردى ءوندىرۋ دەڭگەيىن جىلىنا 11-12 ملن توننا شەگىندە ۇستاپ تۇرۋ بويىنشا جوبالار ىسكە اسىرىلۋدا. بىرىنشىدەن، 2021 جىلى قۇنى 1،1 ملرد اقش دوللارىنا گاز وڭدەۋ قۋاتىن ارتتىرۋ جوباسى ىسكە قوسىلدى. ەكىنشىدەن، قۇنى 578 ملن اقش دوللارىنا گازدى كەرى ايداۋ 4ء-شى كومپرەسسورىن پايدالانۋعا بەرۋ ءۇشىن ىسكە قوسۋ-جوندەۋ جۇمىستارى جۇرگىزىلۋدە. ۇشىنشىدەن، شيكى گازدى كەرى ايداۋدىڭ 5ء-شى كومپرەسسورىن سالۋ جۇمىستارى باستالدى. جوبانىڭ بيۋدجەتى - 970 ملن اقش دوللارى. اياقتالۋ مەرزىمى - 2025 جىل»، - دەدى بولات اقشولاقوۆ.