بيىل قارجىلاندىرىلاتىن ۇلتتىق فيلمدەردىڭ ىرىكتەۋ ەرەجەسىنە وزگەرىستەر ەنگىزىلدى

ۇلتتىق كينو ورتالىعى جاڭا ەرەجەنىڭ 12 ساۋىردەن باستاپ كۇشىنە ەنەتىنىن حابارلادى

جاڭا وزگەرىستەر قامتىلعان بۇيرىق 2024 جىلدىڭ 12 ساۋىرىنەن باستاپ كۇشىنە ەنەدى، دەپ حابارلايدى Almaty-akshamy.kz.

كينوجوبالاردى ىرىكتەۋ ەكى كەزەڭدە جۇزەگە اسادى. ءبىرىنشى كەزەڭ – فيلمدەردىڭ سەنارييىن (ويىن جانە انيماسيالىق فيلمدەر ءۇشىن) نەمەسە سەناريي جوسپارلارىن (دەرەكتى جانە حرونيكالى فيلمدەر ءۇشىن) قاراۋ. ەكىنشى كەزەڭدە تاقىرىپتىق جوسپارعا ساي كەلەتىن، ۇلتتىق كينو ورتالىعى جانىنداعى ساراپتاما كەڭەسى ىرىكتەگەن جوبالاردىڭ قۇجاتتارىن جيناقتاۋ جۇزەگە اسىرىلادى. قۇجاتتاردى تاپسىرعاننان كەيىن ۇمىتكەرلەرگە انىقتالعان قاتەلەردى تۇزەتۋگە 3 كۇن ۋاقىت بەرىلەدى.

كينو ورتالىعى قۇجات قابىلداۋ اياقتالعاننان كەيىن تالاپتارعا ساي كەلەتىن ءوتىنىش بەرۋشىلەردىڭ قۇجاتىن ساراپتاما كەڭەسىنىڭ قاراۋىنا جىبەرەدى. سودان كەيىن كينوجوبالاردىڭ اشىق قورعاۋ (پيچينگ) كۇنى بەلگىلەنىپ، ۇمىتكەرلەرگە پيچينگتى وتكىزۋ ۋاقىتى قوسىمشا حابارلانادى. پيچينگ اشىق فورماتتا وتكىزىلەدى جانە ساراپتاما كەڭەسى ءار كاتەگوريا بويىنشا ءادىل شەشىم شىعارۋعا ىقپال ەتەدى.

ورتالىق ساراپتاما كەڭەسىنىڭ قورىتىندىسىن ۆەدومستۆوارالىق كوميسسيانىڭ قاراۋىنا ەنگىزەدى.

كونكۋرستىڭ بارلىق كەزەڭدەرىنە قاتىستى اقپاراتتار ورتالىقتىڭ ينتەرنەت-رەسۋرسىندا جانە الەۋمەتتىك جەلىلەرىندەگى رەسمي اككاۋنتتارىندا قولجەتىمدى بولادى. بۇل شارالار مەملەكەتتىك قولداۋعا يە بولاتىن كينوجوبالاردى ىرىكتەۋدەگى اشىقتىقتى قامتاماسىز ەتپەك.