الماتىدا مۇگەدەكتىگى بار 23 مىڭنان استام ادام الەۋمەتتىك قىزمەتتەر پورتالى ارقىلى قىزمەت الدى.
2024 جىلى مۇگەدەكتىگى بار ادامداردى الەۋمەتتىك قولداۋعا 16،8 ميلليارد تەڭگە بولىنگەن، بۇل باعىتتا قارجى كولەمى جىل سايىن ارتىپ كەلەدى. الماتى قالاسىنىڭ جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى باۋىرجان جاۋباسوۆتىڭ مالىمەتىنشە، قالادا مۇگەدەكتىگى بار 57،7 مىڭ ادام، ونىڭ ىشىندە 9526-سى 18 جاسقا دەيىنگى بالالار تۇرادى.
جەكە رەابيليتاسيا جانە وڭالتۋ باعدارلاماسىنىڭ اياسىندا 35 123 مۇگەدەك ادام تەحنيكالىق قۇرالدارمەن جانە وڭالتۋ قىزمەتتەرىمەن قامتاماسىز ەتۋگە جۇگىندى، ولاردىڭ 23 170ء-ى قاجەتتى قۇرالدارمەن جانە قىزمەتتەرمەن ءساتتى قامتاماسىز ەتىلدى.
وڭالتۋ قۇرالدارىن الەۋمەتتىك قىزمەتتەر پورتالى ارقىلى الۋ مۇمكىندىگى بار، ءبىراق قاجەت بولعان جاعدايدا مەملەكەتتىك ساتىپ الۋ ارقىلى جەكە قاجەتتىلىكتەرگە سايكەس بالامالى قۇرالدارمەن قامتاماسىز ەتۋ مۇمكىندىگى دە قاراستىرىلعان.
سونىمەن قاتار، «الماتى قالاسىن 2025 جىلعا دەيىن دامىتۋ باعدارلاماسىن جانە 2030 جىلعا دەيىنگى ورتا مەرزىمدى پەرسپەكتيۆالاردى» ىسكە اسىرۋ جونىندەگى جول كارتاسى اياسىندا وڭالتۋدىڭ يننوۆاسيالىق تەحنيكالىق قۇرالدارىمەن قامتاماسىز ەتۋ جالعاستىرىلدى. وسى باعدارلاما بويىنشا 288 ادامدى، ونىڭ ىشىندە جاڭا تەحنولوگيا بويىنشا پروتەزدىك-ورتوپەديالىق قۇرالدارمەن، كرەسلو-اربامەن، سويلەۋ پروسەسسورلارىمەن جانە سۇيەك وتكىزگىش ەستۋ اپپاراتتارىمەن قامتاماسىز ەتۋ جوسپارلانۋدا.
قوسىمشا قىزمەتتەر رەتىندە مۇگەدەكتىگى بار ادامدارعا «ينۆاتاكسي» قىزمەتتەرى ۇسىنىلادى، بۇل قىزمەت مەملەكەتتىك الەۋمەتتىك تاپسىرىسپەن 100 اۆتوكولىك ارقىلى جۇزەگە اسىرىلادى. وتكەن جىلدان باستاپ «ياندەكس تاكسي» اگرەگاتورى ارقىلى قىزمەت كورسەتۋ بويىنشا پيلوتتىق جوبا ىسكە قوسىلدى، بۇل قاجەتتى ادامداردى قامتۋ اياسىن 1،5 مىڭنان 2،5 مىڭ ادامعا دەيىن ۇلعايتۋعا مۇمكىندىك بەردى.