بيىلعى 1 قاڭتاردان باستاپ مىندەتتى الەۋمەتتىك مەديسينالىق ساقتاندىرۋعا تولەنەتىن جارنالار مەن اۋدارىمدار مولشەرى وزگەردى. بيىل كىم قانشا جارنا تولەيدى؟ جارنا كولەمىنىڭ وزگەرۋىنە نە تۇرتكى بولدى؟ وسى ماسەلەگە قاتىستى سۇراقتارعا مەديسينالىق ساقتاندىرۋ قورىنىڭ الماتى فيليالى ديرەكتورى تىلەۋحان ابىلدايەۆ جاۋاپ بەردى.
ەستەرىڭىزگە سالا كەتسەك، 2024 جىلى ەڭ تومەنگى جالاقى كولەمى 85 000 تەڭگەنى قۇرايدى.
فيليال باسشىسى جارنا تولەۋشىلەردىڭ بىرنەشە ساناتىن اتاپ ءوتتى. ءبىرىنشىسى – مەملەكەت تاراپىنان ساقتاندىرىلاتىن 15 جەڭىلدىك ساناتى. وعان بالالار، زەينەتكەرلەر، ۇوس ارداگەرلەرى، بارلىق توپتاعى مۇگەدەكتەر، «التىن القا»، «كۇمىس القامەن» ماراپاتتالعان كوپ بالالى انالار، جۇمىس ىستەمەيتىن جۇكتى ايەلدەر، دەكرەتتە وتىرعان انالار، مۇگەدەك بالا كۇتىمىنە بايلانىستى جۇمىس ىستەمەيتىن ازاماتتار، ستۋدەنتتەر ت.ب. كىرەدى. جەڭىلدىك بەرىلگەن حالىقتىڭ جالپى سانى 11 ميلليونعا جەتىپ جىعىلادى. 2024 جىلى مەملەكەتتىڭ ءبىر ازاماتقا تولەنەتىن جارناسى ايىنا 5852،63 تەڭگەنى قۇرايدى
اتاپ ايتقاندا، بيىل جۇمىس بەرۋشىلەر قاراماعىنداعى قىزمەتكەرلەر ءۇشىن بۇرىنعىشا، جالاقىنىڭ 3% مولشەرىندە اۋدارىم جاسايدى. تولەمنىڭ شەكتى مولشەرى 10 ەتج نەمەسە 25 500 تەڭگەدەن اسپايدى. جۇمىس بەرۋشى اۋدارىمدى ءوز قالتاسىنان تولەيدى. ال جۇمىسكەرلەر جالاقىسىنان 2% ۇستاپ، قورعا اۋدارادى. جارنانىڭ شەكتى مولشەرى 10 ەتج نەمەسە 17 000 تەڭگەدەن اسپاۋى ءتيىس.
ودان كەيىنگى سانات – جەكە كاسىپكەرلەر. نوتاريۋستار، جەكە سوت ورىنداۋشىلارى، ادۆوكاتتار دا وسى ساناتقا كىرەدى. ولار بۇرىنعىشا 1،4 ەتج-نىڭ 5%-ىن تولەيدى. بيىل ەڭ تومەنگى جالاقىنىڭ وسۋىنە بايلانىستى بۇل سوما 5950 تەڭگەگە جەتتى.
ازاماتتىق-قۇقىقتىق كەلىسىمشارت بويىنشا ەڭبەك ەتەتىندەر ساقتاندىرۋعا بۇرىنعىشا تابىسىنىڭ 2%-ىن اۋدارادى.
«قازاقستاندا ءوزىن-وزى جۇمىسپەن قامتىعان ازاماتتار بار. بۇل ازاماتتار ساقتاندىرۋ جۇيەسىنە قوسىلۋ ءۇشىن ەكى ءتۇرلى ءادىستى پايدالانسا بولادى. ءبىرىنشىسى – دەربەس تولەۋشى رەتىندە ءبىر ەتج-نىڭ 5%-ىن نەمەسە 4250 تەڭگە تولەۋ. ەكىنشىسى – جەكە كاسىپكەر رەتىندە تىركەلۋ جانە جارنالاردى جك رەتىندە تولەۋ»، – دەدى تىلەۋحان ابىلدايەۆ.
ساقتاندىرۋ مارتەبەسىن كەلەسى جولدارمەن تەكسەرۋگە بولادى:
• Qoldau 24/7 ءموبيلدى قوسىمشاسى؛
• fms.kz رەسمي سايتى؛
• Telegram-داعى @SaqtandyrýBot؛
• 1414 بايلانىس ورتالىعى؛
• Damumed ءموبيلدى قوسىمشاسى؛
• Halyk ءموبيلدى قوسىمشاسى؛
• BCC.KZ ءموبيلدى قوسىمشاسى؛
• Kaspi.kz ءموبيلدى قوسىمشاسى؛
• egov.kz ەلەكتروندىق ۇكىمەت سايتى – «مەديسينالىق قىزمەتتەردى تۇتىنۋشى رەتىندە قاتىسۋ تۋرالى جانە مىندەتتى الەۋمەتتىك مەديسينالىق ساقتاندىرۋ جۇيەسىندە اۋدارىمداردىڭ جانە (نەمەسە) جارنالاردىڭ اۋدارىلعان سومالارى تۋرالى اقپارات بەرۋ» مەملەكەتتىك قىزمەتى ارقىلى.