قازاقستانعا 2025 جىلدىڭ باسىنان بەرى 9 586 ەتنيكالىق قازاق ورالىپ، قانداس مارتەبەسىن يەلەندى، دەپ حابارلايدى aqshamnews.kz
جالپى 1991 جىلدان باستاپ رەسپۋبليكاعا 1 ملن 157،6 مىڭ ەتنيكالىق قازاق قونىس اۋدارعان.
قانداستاردىڭ كەلۋ گەوگرافياسى:
45،7% – وزبەكستاننان،
41،8% – قىتايدان،
4،6% – تۇرىكمەنستاننان،
2،7% – موڭعوليادان،
2،6% – رەسەيدەن،
2،6% – وزگە ەلدەردەن.
قانداستاردىڭ جاس ەرەكشەلىگى مەن ءبىلىم دەڭگەيى
2025 جىلعى 1 قىركۇيەكتەگى جاعداي بويىنشا ەتنيكالىق قونىس اۋدارۋشىلاردىڭ:
58،7%-ى – ەڭبەككە قابىلەتتى جاستاعىلار،
32،3%-ى – بالالار مەن جاستار،
9%-ى – زەينەتكەرلەر.
ەڭبەككە قابىلەتتى جاستاعىلاردىڭ ىشىندە:
15،4%-ى – جوعارى ءبىلىمدى،
29،7%-ى – ورتا كاسىبي ءبىلىمدى،
52،3%-ى – جالپى ورتا ءبىلىمدى،
2،6%-ىنىڭ ءبىلىمى جوق.
قونىستاندىرۋ وڭىرلەرى مەن كۆوتالار
ەتنيكالىق قازاقتار ەلدىڭ ءتۇرلى وڭىرلەرىنە ورنالاستىرىلدى. ەڭبەك كۇشى تاپشى ايماقتار رەتىندە مىنا وبلىستار بەلگىلەنگەن: اقمولا، اباي، قوستاناي، پاۆلودار، اتىراۋ، باتىس قازاقستان، شىعىس قازاقستان جانە سولتۇستىك قازاقستان.
2025 جىلعا ارنالعان قانداستاردى قابىلداۋ كۆوتاسى – 2 309 ادام. ونىڭ ىشىندە 1 قىركۇيەككە دەيىن 1 467 قانداس قونىستاندى.
مەملەكەتتىك قولداۋ شارالارى
قونىستانعان قانداستارعا مىناداي الەۋمەتتىك قولداۋ ۇسىنىلادى:
كوشۋگە – ءار وتباسى مۇشەسىنە 70 اەك (275،2 مىڭ تەڭگە) مولشەرىندە ءبىرجولعى تولەم؛
تۇرعىن ءۇي جالداۋعا جانە كوممۋنالدىق قىزمەتكە – جىلىنا 15–30 اەك (58،9–117،9 مىڭ تەڭگە) ارالىعىندا.
جىل باسىنان بەرى 594 قانداسقا قولداۋ كورسەتىلدى، ونىڭ ىشىندە 237 ادام تۇراقتى جۇمىسقا ورنالاستى.
قوسىمشا ىنتالاندىرۋ شارالارى
ەرىكتى قونىس اۋدارۋدى كۇشەيتۋ ماقساتىندا جۇمىس بەرۋشىلەردى قولداۋ تەتىكتەرى ەنگىزىلدى.
سونىمەن قاتار، ەكونوميكالىق ۇتقىرلىق سەرتيفيكاتى قاراستىرىلعان. ول تۇرعىن ءۇي ساتىپ الۋ نەمەسە سالۋ، سونداي-اق يپوتەكالىق قارىز بويىنشا باستاپقى جارنانى جابۋ ءۇشىن بەرىلەدى.
بۇل سەرتيفيكات وتباسىعا ءۇي قۇنىنىڭ 50%-ىنا دەيىن نەمەسە 4،56 ملن تەڭگەگە دەيىنگى مولشەردە قايتارىمسىز تولەنەدى.