جاڭا 2024 جىل الەمدە ماڭىزدى كەزەڭ بولماق.
بيىل ءبىرقاتار دەرجاۆا پرەزيدەنت سايلاۋىن وتكىزەدى. بيىل 64 ەل پرەزيدەنتىن سايلايدى ەكەن. 2 ملرد ادام داۋىس بەرۋگە قاتىسادى، دەپ حابارلايدى Almaty-akshamy.kz 24.kz ارناسىنىڭ شولۋىنا سىلتەمە جاساي وتىرىپ.
اقش-تاعى پرەزيدەنت سايلاۋىنا تورتكۇل دۇنيە كوز تىگەدى. ساياسي باسەكە بۇعان دەيىن-اق باستالىپ كەتكەن. ساراپشىلار پرەزيدەنت دجو بايدەن ورىنتاعىن ساقتاپ قالا ما، الدە باسقا ۇمىتكەر ەل تىزگىنىن قولعا ۇستاي ما دەگەن ساۋالدى قىزۋ تالقىلاپ جاتىر. ۇمىتكەرلەر قاتارىندا بىرنەشە ادامنىڭ ەسىمى ءمالىم بولدى. ەڭ تانىمالى دجو بايدەن مەن دونالد ترامپ. بۇل ەكەۋى ءبىر-بىرىنىڭ كوزىن شۇقىپ، كەمشىلىكتەرىن بەتكە باسۋدان الدىنا قارا سالار ەمەس. ترامپ اق ءۇيدىڭ قازىرگى قوجايىنىن IQء-ى تومەن دەپ كەمسىتتى، ال دجو بايدەن ونى بۇلىكشى دەپ ايىپتادى.
«دجو بايدەن مەن دەموكراتيالىق پارتيا كەز كەلگەن ماسەلەنى شەشە المايدى. قيسىق دجو – ءبىزدىڭ ەل تاريحىنداعى ەڭ ناشار، قابىلەتسىز جانە جەمقور پرەزيدەنت»، - اقش-تىڭ ەكس-پرەزيدەنتى دونالد ترامپ.
بۇل سوزگە، كەزىندە ترامپتى ءالسىز دەپ ءاجۋالاپ، 2020 جىلى دجو بايدەن پرەزيدەنت بولعان كەزدە، ونى ءبىرىنشى بولىپ قۇتتىقتاعان كانادا پرەمەر-مينيسترى جاۋاپ بەردى.
«ەگەر ترامپ بيلىككە قايتىپ كەلەتىن بولسا، دەموكراتياعا، سىرتقى ساياساتقا جانە گەوساياساتقا اۋىر زارداپتار اكەلەدى»، - دەيدى كانادا پرەمەر-مينيسترى دجاستين تريۋدو.
جالپى جىلدىڭ پەردەسىن اشاتىن سايلاۋ – تايۋاندا وتەدى. ونان سوڭ، ازەربايجان، رەسەي، فرانسيا، ءۇندىستان، المانيا جانە برازيليا حالقى ءوز باسشىسىن سايلايدى. ال اقش-تاعى سايلاۋ، الەم كوز تىگىپ، اڭدىپ وتىرعان سايلاۋلاردىڭ ءبىرى ءارى باستىسى بولماق. ساراپشىلاردىڭ پىكىرىنشە، سايلاۋ ناتيجەسى الەمدە بولىپ جاتقان قاقتىعىستارعا تىكەلەي اسەر ەتەدى.
وتشاشۋ مەن وق شاشۋ
يزرايل مەن حاماس اراسىنداعى قاقتىعىستىڭ توقتايتىن ءتۇرى جوق. جاڭا جىل قارساڭىندا يزرايل قورعانىس ارمياسىنىڭ وكىلى دانيەل حاگاري شابۋىلدى ودان ءارى ۇدەتۋگە كۇش سالىپ جاتقانىن مالىمدەدى. گازا دەنساۋلىق ساقتاۋ مينيسترلىگىنىڭ مالىمەتى بويىنشا، 7 قازاننان باستاپ گازا سەكتورىندا 21 مىڭ 978 ادام قازا تاپقان. ونىڭ باسىم بولىگى ايەل مەن بالا. ال جاڭا جىلدان كەيىن، مينيسترلىك سوڭعى 24 ساعات ىشىندە 156 ادام قازا تاۋىپ، 246 ادام جارالانعانىن مالىمدەدى. گازانىڭ تاعدىرى بۇلىڭعىر.
بۇۇ وكپەلى
بىرىككەن ۇلتتار ۇيىمى وتكەن جىلعا وكپەلى. "2023 جىل ۇلكەن ازاپتىڭ، زورلىق-زومبىلىق جانە كليماتتىق حاوس جىلى" بولدى دەيدى. راسىمەن دە، ادامزات قاتتى زارداپ شەكتى. كەدەيلىك پەن اشتىق القىمنان الدى. قاقتىعىستار كوبەيدى. ءتۇرلى ىندەت تارادى. دەگەنمەن كەلەر جىلدان ءۇمىت كوپ... بىلتىرعى كليمات جونىندەگى سامميتتە الەم ەلدەرى العاش رەت جاڭارتىلعان ەنەرگيا كوزدەرىنە كوشۋگە كەلىسكەن ەدى. بيىل ايتۋلى داتالاردىڭ قاتارىنا 26 قاڭتار “حالىقارالىق تازا ەنەرگيا كۇنى” قوسىلدى. ماقسات – جاھاندىق جىلىنۋمەن كۇرەس. بۇل الەم ءۇشىن ماڭىزدى قادامنىڭ باسى بولماق.
«2024 جىل سەنىم مەن ءۇمىتتى قالپىنا كەلتىرۋ جىلى بولۋى كەرەك. ورتاق شەشىمگە كەلۋ ءۇشىن كەلىسپەۋشىلىكتەرگە قاراماستان بىرىگۋىمىز كەرەك. كليماتتىڭ وزگەرۋىمەن كۇرەسۋ. ەكونوميكالىق مۇمكىندىكتەر مەن بارلىعىنا پايدا اكەلەتىن ءادىل جاھاندىق قارجى جۇيەسىن قۇرۋىمىز كەرەك»، - دەيدى بۇۇ باس حاتشىسى انتونيۋ گۋتەرريش.
2023 جىلى ءتۇيىنى كوپ ماسەلە تارازىعا سالىنىپ، جان-جاقتى تالقىلاندى. ەندى سونىڭ نۇكتەسىن قويۋ بيىلعى جىلدىڭ ەنشىسىندە دەيدى، ساراپشىلار.