70 مىڭ قازاقستاندىققا ءۇيدى جالعا الۋ ءۇشىن سۋبسيديا بەرۋ جوسپارلانعان.
ق ر پرەمەر-مينيسترى ءاليحان سمايىلوۆ اۋىلداعى 2،8 مىڭعا جۋىق ادام جاڭا باسپاناعا يە بولاتىنىن ايتتى، دەپ حابارلايدى Almaty-akshamy.kz.
«بيىل، بولجام بويىنشا، 15 ملن شارشى مەتر تۇرعىن ءۇي پايدالانۋعا بەرىلەدى. بۇل 138 مىڭ وتباسىنىڭ باسپانا جاعدايىن جاقسارتۋعا مۇمكىندىك بەرەدى. جالپى، جىل باسىنان بەرى بۇل سالادا وڭ ديناميكا قالىپتاسىپ وتىر. 5 ايدا 4،7 ملن شارشى مەتر تۇرعىن ءۇي پايدالانۋعا بەرىلدى. بۇل 39 مىڭ وتباسىن جاڭا باسپانامەن قامتۋعا جاعداي جاسايدى»، - دەدى ۇكىمەت باسشىسى ءبىرىنشى كەزەكتە تۇرعىن ءۇيدىڭ باعاسىن قولجەتىمدى ەتۋ ماڭىزدى ەكەنىن ەسكە سالىپ.
ءاليحان سمايىلوۆتىڭ ايتۋىنشا، ەندى باسپانا كەزەگىندە تۇرعاندار ءۇشىن تۇرعىن ءۇيدى ءبولۋ «ءبىر تەرەزە» قاعيداتى بويىنشا ءبىر ورتالىقتان، اشىق تۇردە جۇرگىزىلەتىن بولادى. ونىڭ نەگىزگى وپەراتورى – «وتباسى بانكى». سونىمەن قاتار، ازاماتتاردى تۇرعىن ۇيمەن قامتاماسىز ەتۋدىڭ جاڭا مەحانيزمدەرى ازىرلەندى.
«وندا ارەندالىق تولەمدى سۋبسيديالاۋ جانە اۋىلدى جەرلەردە تۇرعىن ءۇي سالۋ سياقتى قولداۋ شارالارى بار. بيىل جاڭا مەحانيزمدەر ەسەبىنەن 70 مىڭ ازاماتقا ءۇيدى جالعا الۋ ءۇشىن سۋبسيديا بەرۋ جانە اۋىلدى جەرلەردە 2،8 مىڭعا جۋىق ادامدى جاڭا باسپانامەن قامتاماسىز ەتۋ جوسپارلانعان»، - دەدى ءاليحان سمايىلوۆ.