وتكەن جىلى ءموبيلدى بايلانىس وپەراتورلارىنا 132 ملن تەڭگە ايىپپۇل سالىنعان.
2022 جىلى ەلدەگى 160-قا جۋىق اۋىلدا ينتەرنەت ساپاسى جاقسارادى، دەپ حابارلايدى Almaty-akshamy.kz
سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگىنىڭ القا وتىرىسىندا وتكەن جىلدارى اتقارىلعان جۇمىستار قورىتىندىلانىپ، الدا اتقارىلاتىن مىندەتتەر ناقتىلاندى.
«بىلتىر 611 ەلدى مەكەندە ءموبيلدى ينتەرنەتتىڭ ساپاسى جاقسارتىلدى، ال بيىل 157 اۋىلدا ينتەرنەت ساپاسىن ارتتىرۋ جۇمىسى جوسپارلانىپ وتىر. 2021 جىلى ءسدياوم ماماندارى بايلانىس ساپاسى بويىنشا 562 تەكسەرىس جۇرگىزىپ، بەكىتىلگەن پارامەترلەردى بۇزعانى ءۇشىن بايلانىس وپەراتورلارىنا 132 ملن تەڭگە ايىپپۇل سالىندى. وسىعان بايلانىستى 2022 جىلى ساپاسىز بايلانىسقا ايىپپۇل كولەمىن 1500 ەاك (4 ملن 594 مىڭ 500 تەڭگە، 1 اەك – 3 مىڭ 63 تەڭگە) دەيىن كوتەرۋ جوسپاردا بار»، - دەپ جازىلعان حابارلامادا.
سونداي-اق بۇگىندە كاسپيي تەڭىزىنىڭ تۇبىندە تالشىقتى وپتيكالىق بايلانىس جەلىسىن سالۋ جۇمىس قولعا الىنعان. بۇل ەلىمىزدى ەۋرازيا ورتالىعىنداعى سيفرلىق حابقا اينالدىرۋ جولىنداعى ماڭىزدى جوبالاردىڭ ءبىرى بولىپ سانالادى.
«وتكەن جىلى ەلىمىز +997 تەلەفوندىق كودىن رەزەرۆكە العان، ءبىراق ءالى +7 ايماعىندا قالۋ مۇمكىندىگى بار. وسى باعىتتا ءسدياوم ماماندارى رەسەيلىك تاراپپەن جانە حالىقارالىق ەلەكتربايلانىس وداعىمەن ءتيىستى جۇمىستار جۇرگىزىپ جاتىر»، - دەپ جازىلعان حابارلامادا.