بيۋدجەت قارجىسى جۇمسالعان ەكى نىسان جارامسىز كۇيدە

جاۋاپتىلار 10 جىل بۇرىن باستالعان 1200 ورىندىق نىساننىڭ بولىكتەرى جارامسىز بولىپ قالعانىن ايتادى. عيماراتتى قايتا قولعا الۋ ءۇشىن تاعى 5 ملرد تەڭگە قاجەت، دەپ حابارلايدى Almaty-akshamy.kz Inbusiness.kz-كە سىلتەمە جاساپ.

قازىنا قارجىسى جۇمسالعان بۇل نىساندا جۇمىستار 2011 جىلى باستالعان. ەرەكشە ارحيتەكتۋرالىق عيمارات ءۇشىن سول كەزدەگى ءوڭىر اكىمى بەرگەي رىسقالييەۆتىڭ باسى ۇلكەن داۋعا قالعان ەدى. سەبەبى مەردىگەر كومپانيانىڭ ۇستىنەن ءىس قوزعالىپ، جوباعا ارتىق اقشا اۋدارىلعانى انىقتالعان. 

"سمەتالىق باعاسى كونسەرت زالىنىڭ 3 ملرد 800 ملن. قۇرىلىس توقتاتقان ۋاقىتتا 2012 جىلى 2،3 ملر جويىلىپ كەتكەن كونسەرت زالىنىڭ. سونى تەكسەرۋ كەزىندە 1 ملرد ارتىق كەتىپ قالعانى انىقتاعان سول كەزدە. ول كەرى قاراي قايتارىلدى ما، قايتارىلمادى ما ول جايلى مالىمەت جوق"، دەيدى وبلىستىق قۇرىلىس باسقارماسىنىڭ ءبولىم باسشىسى نۇرلىبەك ساقپاروۆ.

ءقازىر كونسەرت زالى سۇرىقسىز كۇيدە. تەرەزەلەرى سىنىپ، تەمىرلەرىن توت باسقان. قاراۋسىز قالعان اۋماقتا قوقىس كوپ. جاۋاپتىلار 10 جىل بۇرىن سالىنعان نىسان بولىكتەرىنىڭ جارامسىز ەكەنىن مويىندايدى. ءقازىر ونى باسقارما بالانسىنا الۋعا كۇش سالىپ جاتقان كورىنەدى. ءبىراق ناتيجە از. شەندىلەر ارىزدا قاتەلىك جىبەرگەندىكتەن، سوت رۇقسات ەتپەي وتىر. 

"سنابويلستروي جشس-نەن اتىراۋ وبلىسى قۇرىلىس باسقارماسى مم-نە قابىلداۋ-تاپسىرۋ اكتىسىنىڭ بولۋ فاكتىسىن انىقتاۋدى سۇراعان. اتىراۋ قالالىق سوتىنىڭ 2022 جىلى 5 قازانداعى ۇيعارىمىمەن اتالعان ارىزدى قابىلداۋدان باس تارتىلعان. سەبەبى ارىزدانۋشىنىڭ قويعان ماسەلەسى سوتپەن انىقتالۋعا جاتاتىن زاڭدىق ماڭىزى بار فاكتىلەر جاتپايدى. ۇيعارىمدا تاراپتاردىڭ مەملەكەتتىك ساتىپ الۋ شارتىن داۋلاۋعا قۇقىلى ەكەندىگى ءتۇسىندىرىلدى"، دەدى اتىراۋ وبلىستىق سوتىنىڭ باسپا ءسوز حاتشىسى مەيرامگۇل وتەعۇلوۆا.