قوڭىراۋلار بجزق قىزمەتكەرلەرىنەن تۇسپەيتىنىن ەسكەرتەدى
ءبىرىڭعاي جيناقتاۋشى زەينەتاقى قورى جاڭا الاياقتىق ءادىسى تۋرالى ايتتى. اتاپ ايتقاندا، بەلگىسىز تۇلعالار ءوزىن "بجزق" قىزمەتكەرىمىن دەپ تانىستىرىپ، سالىمشىنىڭ زەينەتاقى شوتىن اشۋ ءۇشىن قانداي دا ءبىر بانكتىك شوتتى تولتىرۋدى سۇرايدى ەكەن، دەپ حابارلايدى Almaty-akshamy.kz.
قوڭىراۋ شالۋشىلاردىڭ ايتۋىنشا، زەينەتاقى شوتى سوت ءىسىن جۇرگىزۋ ءۇشىن وتەماقى تولەۋ بويىنشا شەتەلدىك بانكتەردەن تولەمدەر قابىلداۋ ءۇشىن قولدانىلادى. ەگەر ءسىز اقشا اۋدارۋدان باس تارتساڭىز، زەينەتاقى شوتى بۇعاتتالىپ قالادى-مىس.
«بجزق مۇنداي قوڭىراۋلار بجزق قىزمەتكەرلەرىنەن تۇسپەيتىنىن ەسكەرتەدى جانە مۇنداي قوڭىراۋلار تۇسكەن جاعدايدا اڭگىمەنى توقتاتۋدى سۇرايدى»، - دەلىنگەن بجزق حابارلاماسىندا.
قور مىنا زاڭ تارماقتارىن ەسكە سالدى:
"قازاقستان رەسپۋبليكاسىندا زەينەتاقىمەن قامسىزداندىرۋ تۋرالى" قازاقستان رەسپۋبليكاسى زاڭىنىڭ (بۇدان ءارى – زاڭ) 50-بابىنىڭ 3-تارماعىنا سايكەس، سالىمشىنىڭ (الۋشىنىڭ) بورىشتارى بويىنشا زەينەتاقى جيناقتارىنا تىيىم سالۋعا نەمەسە ءوندىرىپ الۋعا جول بەرىلمەيدى.
"اتقارۋشىلىق ءىس جۇرگىزۋ جانە سوت ورىنداۋشىلارىنىڭ مارتەبەسى تۋرالى" قازاقستان رەسپۋبليكاسى زاڭىنىڭ 98-بابى 14تارماعىنا سايكەس، سالىمشىنىڭ (الۋشىنىڭ) بورىشتارى بويىنشا زەينەتاقى جيناقتارىنان ءوندىرىپ الۋعا بولمايدى.
«وسىلايشا سوت ورىنداۋشىسىنىڭ نەمەسە كەز كەلگەن ءۇشىنشى تۇلعانىڭ ءسىزدىڭ جەكە زەينەتاقى شوتىڭىزداعى زەينەتاقى جيناقتارىنان ءوندىرىپ الۋى مۇمكىن ەمەس. ءسىزدىڭ جەكە زەينەتاقى شوتىڭىز ەشقانداي جاعدايدا بۇعاتتالمايدى»، - دەپ جازدى بجزق اق.