الماتىلىق ازامات بىرنەشە رەت ۆەلوسيپەد ۇرلادى دەگەن كۇدىككە ءىلىندى.
المالى اۋداندىق پوليسيا باسقارماسىنىڭ الدىن الا مالىمەتى بويىنشا، ە. ەسىمدى 28 جاستاعى ازامات بوتەننىڭ ۆەلوسيپەدىن 4 رەت ۇرلاعانىن مويىندادى. بەلگىلى بولعانداي، ول ۇرلانعان زاتتاردى قالانىڭ بازارلارىندا ساتقان، دەپ حابارلايدى Almaty-akshamy.kz.
ونىڭ ۇستىنە بۇل ەپيزودتاردىڭ بارلىعى قالاداعى بەينەباقىلاۋ جۇيەلەرىنە ءتۇسىپ قالعان.
«ۇرلىقتىڭ باسىم بولىگى كوشەلەردە، ساۋدا ورتالىقتارىنىڭ ماڭىندا جاسالعان. بولجام بويىنشا، كۇدىكتى يەسىن “كۇتىپ” تۇرعان ەكى دوڭعالاقتى كولىكتى قاراپ، وعان جاقىنداپ، بەكىتۋدى شەشىپ، ۆەلوسيپەدتى الىپ كەتكەن. سوسىن ۇرلانعان ۆەلوسيپەدتەردى ارزان باعادا ساتقان. ءبىر قىزىعى، قاسكوي قىلمىستى ءبىر كيىممەن جاساپ، سول كيىممەن ۇستالعان. قازىرگى ۋاقىتتا ول ۋاقىتشا ۇستاۋ يزولياتورىنا قامالدى. ۇستالعان ازاماتتىڭ قالا اۋماعىندا جاسالعان باسقا دا قىلمىستارعا قاتىسى بار-جوعىن انىقتاۋ جۇمىستارى جۇرگىزىلىپ جاتىر»، – دەدى المالى اۋداندىق پوليسيا باسقارماسىنىڭ باستىعى ەسەن ىسقاقوۆ.