بۇگىن، 15 تامىز الماتىدا «قازاقستان حالقى اسسامبلەياسى مەن كونستيتۋسيا: بىرلىك پەن كەلىسىم جولىنداعى ءۇش ونجىلدىق» تاقىرىبىندا كەزدەسۋ ءوتتى. مازمۇندى جيىنعا قازاقستان حالقى اسسامبلەياسى مەن الماتى قالاسى ءماسليحاتىنىڭ «ىنتىماق» دەپۋتاتتىق توبى وكىلدەرى، «قازاقستان رەسپۋبليكاسىنىڭ ۇلتتىق ۇلانى» رەسپۋبليكالىق مەملەكەتتىك مەكەمەسىنىڭ وقىتۋشىلارى مەن كۋرسانتتارى قاتىستى.
ءىس-شارا قازاقستان رەسپۋبليكاسى كونستيتۋسياسى مەن قازاقستان حالقى اسسامبلەياسىنىڭ 30 جىلدىعىنا، سونداي-اق 2025 جىلى جاريالانعان جۇمىسشى ماماندىقتار جىلىنا وراي ۇيىمداستىرىلدى.
– بۇگىنگى جۇزدەسۋىمىزدىڭ باستى ماقساتى – اتا زاڭىمىزدىڭ 30 جىلدىعىنىڭ قارساڭىندا اسسامبلەيانىڭ اتقارىلىپ جاتقان جۇمىستارىمەن تانىستىرۋ. ءارى، كەزدەسۋ ارقىلى ءبىر-بىرىمىزدى ءتۇسىنىپ، ەلىمىزدىڭ ىنتىماعى مەن بىرلىگى جاراسقان مەملەكەتتىڭ قاتارىنا قوسۋ ءۇشىن جاعداي جاساۋ. قازاقستانداعى ءار ۇلت وكىلدەرى ءبىر اتا مەن ءبىر انانىڭ بالاسىنداي تاتۋ، بىزگە قىزىعا دا، قىزعانا قارايتىن ەلدەر كوپ. بىرلىك، ىنتىماق بار جەردە ءبىز دامىعان ءارى ەكونوميكاسى جوعارى مەملەكەتتەردىڭ قاتارىنا قوسىلا الامىز. حالىق قاھارمانى باۋىرجان مومىش ۇلى ايتقانداي، «زاڭعا باعىنعان ەل قۇل بولمايدى». سوندىقتان قانداي لاۋازىمدى تۇلعا بولسا دا، ءبارى زاڭعا بىردەي باعىنۋى كەرەك، – دەدى قازاقستان ۇيعىرلارىنىڭ رەسپۋبليكالىق ەتنومادەني ورتالىعىنىڭ ءتوراعاسى، قازاقستان حالقى اسسامبلەياسى كەڭەسىنىڭ مۇشەسى دولكۋنتاي الييەۆ.
الماتى قالالىق قازاقستان حالقى اسسامبلەياسى ءتوراعاسىنىڭ ورىنباسارى، «قازاقستان ورىس مادەني ورتالىعى» قوعامدىق بىرلەستىگىنىڭ ءتوراعاسى ۆسيەۆولود لۋكاشيەۆ قحا-نىڭ قوعامدىق رولىنە توقتالدى:
– قازاقستان حالقى اسسامبلەياسى – ۇلكەن قۇرىلىم، كونستيتۋسيالىق مارتەبەسى بار ۇيىم. بىرىنشىدەن، بۇل – ەلىمىزدىڭ ەڭ كورنەكتى ازاماتتارى، شىعارماشىلىق زيالى قاۋىم وكىلدەرى، مادەنيەت پەن عىلىم قايراتكەرلەرى توعىسقان ورتا. ەكىنشىدەن، بۇل – ەتنومادەني بىرلەستىكتەردىڭ وكىلدەرى. الەم مەن قازاقستانداعى تىنىشتىق پەن پاتريوتيزم جۇرەكتەن باستالادى. ەلىمىزدە ەتنوستاردىڭ بەدەلدى وكىلدەرىنەن تۇراتىن اقساقالدار كەڭەسى بار. ادەتتە، جاسى ۇلكەن جانە ورتا بۋىن وكىلدەرى ەتنوس ىشىندەگى كەز كەلگەن ماسەلەلەردى شەشە الادى. سونىمەن قاتار، زاڭدى مارتەبەسى بار قۇرىلىم – مەدياسيا كەڭەسى دە بار. بۇل كەڭەستە بارلىق داۋلار سوتقا دەيىنگى تارتىپپەن شەشىلەدى، – دەدى ۆسيەۆولود لۋكاشيەۆ.
ەل بىرلىگىن ساقتاۋ ەلدەگى بارلىق ازاماتقا ورتاق جاۋاپكەرشىلىك. بۇل – تەك مەملەكەتتىك ورگانداردىڭ عانا ەمەس، ءاربىر وتباسىنىڭ، ءاربىر جاستىڭ، ءار ۇلت وكىلىنىڭ ورتاق مىندەتى. بىرلىگىمىز – بەيبىت ءومىردىڭ، تۇراقتى دامۋدىڭ كەپىلى. سوندىقتان تاتۋلىقتى تۋ ەتىپ، ءوزارا تۇسىنىستىك پەن قۇرمەتتى نەگىزگى قۇندىلىق رەتىندە باعالاۋ بۇگىنگى الەۋمەتتىك ءومىردىڭ باستى ۇرانى بولسا كەرەك.