كوگىلدىر ءتولقۇجاتىمىز بەن كوك تۋىمىز – تاريحتىڭ وزىنەن تۋىنداعان جانە ميلليونداعان ادامداردىڭ جۇرەگىندە شىنايى جاۋاپ تۋدىراتىن ءبىزدىڭ بىرەگەيلىگىمىزدىڭ ناقتى نىشاندارى. بۇل تۋرالى قازاقستان حالقى اسسامبلەياسىنىڭ ءحححىى سەسسياسىندا مەملەكەت باسشىسى قاسىم-جومارت توقايەۆ ايتتى، دەپ حابارلايدى Almaty-akshamy.kz. قازاقپارات-قا سىلتەمە جاساپ.
«شىنايى دەموكراتيا سوزبەن ەمەس، ءىس جۇزىندە ۇلتتىڭ ۇدەمەلى ىلگەرىلەۋى مەن ازاماتتىق يدەياسىن نىعايتۋ ءۇشىن ەڭ قولايلى جاعداي جاسايدى. تاۋەلسىزدىك جىلدارى بىزدە جاڭا جالپىۇلتتىق بىرەگەيلىك قالىپتاستى دەپ سەنىمدى تۇردە ايتا الامىز. ول نەدەن كورىنەدى جانە ونىڭ رامىزدەرى قانداي؟ بۇل سۇراققا جاۋاپ بەرۋ ءۇشىن جاساندى يدەولوگيالىق تۇجىرىمدامالاردى ازىرلەۋدىڭ، ينتەرپرەتاسيامەن جانە تولعانىسپەن اينالىسۋدىڭ قاجەتى جوق. نەگىزىندە ءبارى بەتىندە جاتىر. كوگىلدىر ءتولقۇجاتىمىز بەن كوك تۋىمىز – تاريحتىڭ وزىنەن تۋىنداعان جانە ميلليونداعان ادامداردىڭ جۇرەگىندە شىنايى جاۋاپ تۋدىراتىن ءبىزدىڭ بىرەگەيلىگىمىزدىڭ ناقتى نىشاندارى. ءبىزدىڭ ءتولقۇجاتىمىز ادامعا ەتنيكالىق تەگىنە، ءدىني كوزقاراستارىنا، الەۋمەتتىك مارتەبەسىنە قاراماستان، قازاقستان رەسپۋبليكاسىنىڭ ازاماتتىعىنا بايلانىستى قۇقىقتار مەن مىندەتتەردىڭ تولىق كولەمىن بەرەدى»، - دەدى مەملەكەت باسشىسى.
پرەزيدەنتتىڭ پايىمىنشا، قازاقستاننىڭ ءتولقۇجاتىنا يە بولۋ دەگەنىمىز - ەلدىڭ حالىقارالىق ارەناسىندا قۇرمەتتى ازامات بولۋ، بارلىق ەلدەرگە كەدەرگىسىز بارۋ جانە ءوزىن قازىرگى الەمنىڭ اجىراماس بولىگى رەتىندە سەزىنۋ.
بۇل ءارقاشان جانە بارلىق جەردە ءوز مەملەكەتىنىڭ قورعاۋىندا بولۋدى سەزىنۋدى بىلدىرەدى.
«قازاقستان پاسپورتى ءبىزدىڭ بىرلىگىمىز بەن كەلىسىمىمىز نەگىزدەلگەن پروگرەسسيۆتى قۇندىلىقتاردى بىلدىرەدى. ءوز كەزەگىندە قازاقستاننىڭ اسپان تۇستەس كوك تۋى ءبىزدىڭ قاسيەتتى تاۋەلسىزدىگىمىز بەن عاسىرلار بويعى مەملەكەتتىلىگىمىزدى ايقىن بەينەلەيدى. ءبىزدىڭ تۋىمىز ەڭ ءىرى حالىقارالىق سپورتتىق جارىستاردا جانە باسقا دا وسىنداي ءىس-شارالاردا جوعارى كوتەرىلگەن سايىن ءارقاشان ءوز ەلىمىز ءۇشىن ماقتانىش سەزىمىنە يە بولامىز»، - دەدى قاسىم-جومارت توقايەۆ.