الماتىدا حالىقارالىق مۋزەيلەر كۇنىنە ورايلاستىرىلعان «مۋزەيلەر ءتۇنى – 2024» اكسياسى ءوتتى. كورمە زالدارىندا العاش رەت ءشامشى قالداياقوۆتىڭ ماندوليناسى، باۋىرجان مومىش ۇلىنىڭ جازۋ ماشينكاسى مەن دومبىراسى، باقسى سارمۇقان باباس ۇلىنىڭ قىلقوبىزى، ءسابيت مۇقانوۆ پەن عابيت مۇسىرەپوۆتىڭ اڭشىلىق مىلتىقتارى، نۇرعيسا تىلەندييەۆتىڭ جەكە كامەراسى جانە ت.ب. بىرەگەي ەكسپوناتتار قويىلدى.
دىنمۇحامەد قونايەۆتىڭ زەينەتكەرلىككە شىققانعا دەيىن مەملەكەت قايراتكەرى تۋرالى بارلىق اقپاراتتى قامتيتىن 75 پاراقتاعى جەكە ءىسى كوپشىلىكتىڭ قىزىعۋشىلىعىن تۋدىردى. «وتە قۇپيا» بەلگىسى بار قۇجاتتار مۇراجايعا سىيعا تارتىلدى جانە العاش رەت جۇرتشىلىقتىڭ نازارىنا ۇسىنىلدى.
«ءبىر تۇندە عانا ءبىزدىڭ مۇراجايلارعا 12 مىڭنان استام ادام كەلدى. ءار مۇراجايدا قىزىقتى باي باعدارلاما دايىندالدى، مۇراجايلار كەلۋشىلەردى تاڭقالدىرۋعا تىرىستى جانە مەنىڭ ويىمشا، ءبىز مۇنى ىستەي الدىق. كوبىسى بالالارىمەن، نەمەرەلەرىمەن كەلدى، سونىمەن قاتار كوپتەگەن شەتەلدىك تۋريستەر بولدى. جالپى، قالا اكىمى مۇراجاي ءىسىن دامىتۋعا كوپ كوڭىل بولەدى. ءبىزدىڭ ماماندار الەمنىڭ ۇزدىك مۇراجايلارىندا تاعىلىمدامادان وتۋدە. سالا قىزمەتكەرلەرىنىڭ جالاقىسى 30% - عا كوتەرىلدى. سونىمەن قاتار، بيىلعى جىلدان باستاپ بارلىق وقۋشىلار ءۇشىن ءبىزدىڭ مۋزەيلەرگە كىرۋ تەگىن بولدى»، - دەدى الماتى قالاسى مادەنيەت باسقارماسىنىڭ باسشىسى عاني مايلىبايەۆ.
ايتا كەترلىگى، مۇراجاي زالدارىندا تەاترلاندىرىلعان قويىلىمدار ۇسىنىلدى. تاريحي تۇلعالار بەينەسىندەگى اكتەرلەر مۇراجايلارعا كەلۋشىلەردى تاڭ قالدىردى. مىسالى، ورىنبورداعى احمەت بايتۇرسىن ۇلىنىڭ ءومىر كەزەڭىنەن كورىنىس: ۇلت ءمۇعالىمى بالالارىنىڭ وقۋداعى جەتىستىكتەرىن تەكسەرىپ، وتباسىمەن ۋاقىت وتكىزدى. اۋمات پەن شولپان ولەڭ وقىپ، كورەرمەندەردىڭ العىسىنا بولەندى.
سونداي-اق مۇراجايلاردا پول گۋردە، روزا باعلانوۆا، باۋىرجان مومىش ۇلى، ءبىرجان سال، مۇحامەتجان تىنىشبايەۆ، ءسابيت مۇقانوۆ جانە عابيت مۇسىرەپوۆ سياقتى تاريحي تۇلعالاردىڭ «قاتىسۋىمەن» تەاترلاندىرىلعان ەكسكۋرسيالار ۇيىمداستىرىلدى. قۇرمانعازى ءوز كۇيلەرىن ورىندادى، دينا نۇرپەيىسوۆا ءان شىرقادى، ارتىستەر ءشامشى قالداياقوۆتىڭ جانە ت. ب. شىعارمالارىن ورىندادى.
مەموريالدىق مۇراجايلاردا وتكەن كەزدەسۋلەردە تاريحشىلاردىڭ ۇرپاقتارى وزدەرىنىڭ اتاقتى اتا-بابالارىنىڭ ءومىرى مەن قىزمەتى تۋرالى قىزىقتى اڭگىمەلەر ايتتى.
سونداي-اق، قالا مۇراجايلارىندا زياتكەرلىك ويىندار، كۆەست، ۆيكتورينالار، قىش جانە زەرگەرلىك شەبەرلىك ساباقتارى وتكىزىلىپ، كىشكەنتاي كورەرمەندەرگە بەت بوياۋى جاسالدى. ارنايى فوتوايماقتاردا وتباسىلارىمەن بىرگە كەلۋشىلەر ەستەلىك فوتوسۋرەتتەر ءتۇسىرىپ، فوتوستەندتىڭ كومەگىمەن 8 مىڭنان استام فوتوسۋرەت باسىپ شىعاردى.