قاجى اتالاردىڭ جولىن جالعاعان تۇركىستاندىق ازاماتتار ءبىر ايدا مەككەگە جەتۋدى جوسپارلاپ وتىر.
تۇركىستان وبلىسى، كەلەس اۋدانىنا قاراستى اققورعان ەلدى مەكەنىندە تۇراتىن ءبىر توپ ازامات كىشى قاجىلىق پارىزىن وتەۋ ءۇشىن ۆەلوسيپەدپەن جولعا شىقتى، دەپ حابارلايدى Almaty-akshamy.kz Massaget.kz-كە سىلتەمە جاساپ.
قاراپايىم "ۋرال" ۆەلوسيپەدىنە مىنگەن ولار كەشە قازىعۇرت اۋدانى ماڭىنا تۇراقتاعان. ال، بۇگىن "تۇركىستان-سامارا" باعىتى ارقىلى ساپارىن جالعاستىرادى.
«مەككەگە جاياۋ بارساڭ، ءار قادامىڭا ساۋاپ جازىلادى دەيدى. ايتپەسە، ءقازىر بۇگىن ۇشاققا مىنسەڭ، بۇگىن جەتەتىن مۇمكىندىك بار عوي. ءبىز باياعى قاجى اتالارىمىزدىڭ جولىن جاڭعىرتىپ، وسىلاي جاياۋ-جالپى، ۆەلوسيپەدپەن شىعۋدى ءجون كوردىك»، - دەيدى ءجاپپارالى تاشمەتوۆ.
اۋىلدان 4 ادام بولىپ شىققان توپتىڭ قارياسى - ءوزى. جاسى 60-تى القىمداعان. قاسىندا بالاسى جانە تاعى ەكى تۋىسى بار.
«ۇلىم يسلامنىڭ جاسى 29-دا. ال، تۋىستارىم ۇلان 50-دە بولسا، مۇزاففار 47 جاستا. ءوزىم 61-گە اياق باستىم. جولعا قاجەتتى كارتا، كومپاس سەكىلدى زاتتارىمىزدى الدىق. ال، اسىمىزدى جولدان ءىشىپ جاتىرمىز. كەي جەرلەردە ساتىپ الساق، كەي جەرلەردە حالىق وزدەرى تاماقتاندىرىپ ءجۇر»، – دەيدى اقساقال.
اقساقال بۇل ساياحاتقا ءبىراز ۋاقىتتان بەرى دايىندالىپتى. الىس ساپار بولعاندىقتان، ۆەلوسيپەد ءمىنىپ، اۋىل اراسىندا شىنىققان. وسى جولى اۋەلى اقتاۋ قالاسىنا بارىپ ايالداپ، كاسپيي تەڭىزى ارقىلى تۇركياعا وتەدى ەكەن. جالپى، جولاۋشىلار قازىرگى جىلدامدىقتارىمەن ءبىر ايدا مەككە قالاسىنا كىرۋدى جوسپارلاپ وتىر.