ءبىر جىلدا قانشا قازاقتىڭ ەلگە ورالعانى بەلگىلى بولدى

13 مىڭنان استام قازاق قانداس مارتەبەسىن الدى.

قازاقستان ۇكىمەتى ءبىر جىلدا قانشا قازاقتىڭ ەلگە ورالعانىن ايتتى، دەپ حابارلايدى Almaty-akshamy.kz.

«2022 جىلعى 1 قازانداعى جاعداي بويىنشا، 13 362 ەتنيكالىق قازاق تاريحي وتانىنا ورالىپ، قانداس مارتەبەسىن الدى. 1991 جىلدان باستاپ رەسپۋبليكاعا بارلىعى 1 ملن 101،2 مىڭ ەتنيكالىق قازاق ورالدى»، - دەلىنگەن ەڭبەكمينى باسپا ءسوز قىزمەتىنىڭ حابارلاماسىندا.

وسى جىلدىڭ باسىنان باستاپ قازاقستانعا كەلگەن قانداستاردىڭ جارتىسىنان استامى (68،7%) وزبەكستاننان، 10% – قحر-دان، 7،9% – تۇركىمەنستاننان، 4،6% – موڭعوليادان جانە 8،8% - باسقا ەلدەردەن.

كەلگەن ەتنيكالىق قازاقتار نەگىزىنەن الماتى (29،9%)، ماڭعىستاۋ (16،7%)، تۇركىستان (9%) جانە جامبىل (6،5%) وبلىستارىندا، سونداي-اق، استانا (7،8%)، شىمكەنت (7،3%) جانە الماتى (5،8%)قالالارىندا قونىستاندى.

وسى جىلعى 1 قازانداعى جاعداي بويىنشا، ەڭبەككە قابىلەتتى جاستاعى ەتنيكالىق قونىس اۋدارۋشىلاردىڭ سانى 58،9%-دى، ەڭبەككە قابىلەتتى جاستان كىشى ادامدار 27،5%-دى جانە زەينەتكەرلەر 13،7%-دى قۇرايدى.

ەڭبەككە قابىلەتتى جاستاعى قانداستاردىڭ ءبىلىم دەڭگەيى بويىنشا 13،2%-ى جوعارى ءبىلىمدى، 38،9%-ى ارنايى ورتا ءبىلىمدى، 46%-ى جالپى ورتا ءبىلىمدى جانە 1،8%-ىنىڭ ءبىلىمى جوق.