2024 جىلى 18 035 ەتنيكالىق قازاق تاريحي وتانىمەن تابىسىپ، قانداس مارتەبەسىن العان. جالپى 1991 جىلدان بەرى رەسپۋبليكاعا 1 ملن 146،4 مىڭ ەتنيكالىق قازاق ورالعان، دەپ حابارلايدى aqshamnews.kz
جىل باسىنان قازاقستانعا كەلگەن قانداستاردىڭ 45،4% – قىتايدان، 38،9% – وزبەكستاننان، 6% – موڭعوليادان، 5،8% – تۇرىكمەنستاننان، 2،7% – رەسەي مەن 1،3% باسقا ەلدەردەن كەلگەن.
بىلتىر پيلوتتىق رەجيمدە قازاقستان ەلشىلىكتەرى ارقىلى «ءبىر تەرەزە» قاعيداتى بويىنشا قانداس مارتەبەسىن بەرۋ تەتىگى ىسكە قوسىلعان. پيلوتتىق جوبا شەڭبەرىندە ەلىمىزگە كەلۋ، جۇمىس ورنىن تابۋ، تۇرعىن ءۇي بەرۋ مۇمكىندىكتەرى تۋرالى ماسەلەنى شەشۋ مەن رەسپۋبليكا اۋماعىنا كىرمەي-اق قانداس مارتەبەسىن الۋعا بولادى. بۇگىنگى تاڭدا ەتنيكالىق قازاقتاردان جاڭا فورماتتا 22 666 ءوتىنىش قابىلدانعان.
جالپى قونىس اۋدارۋشىلار قاي وڭىرگە بارىپ جاتىر ج"نە قانداي جاعداي جاسالۋدا؟
قونىس اۋدارعان ەتنيكالىق قازاقتار رەسپۋبليكانىڭ ءتۇرلى وڭىرلەرىنە قونىستاندى، سونىڭ ىشىندە ەڭبەك كۇشى تاپشى وڭىرلەر بار: اقمولا، اباي، قوستاناي، پاۆلودار، شىعىس پەن سولتۇستىك قازاقستان وبلىستارى.
قونىستاندىرۋ وڭىرلەرىندە 2024 جىلعا ارنالعان قانداستاردى قابىلداۋ كۆوتاسى 3 033 ادامدى قۇرايدى. بيىلعى 1 جەلتوقسانداعى جاعداي بويىنشا اتالمىش وڭىرلەرگە 2 961 قانداس قونىس اۋدارعان.
جوعارىدا اتالعان وڭىرلەردە قونىستانعان قانداستارعا كوشۋگە سۋبسيديا تۇرىندە مەملەكەتتىك قولداۋ شارالارى ۇسىنىلادى: - ءبىر مەزگىلدە وتاعاسى مەن وتباسىنىڭ ءاربىر مۇشەسىنە 70 اەك (258،4 مىڭ تەڭگە) مولشەرىندە قاراجات؛ - تۇرعىن ءۇي جالداۋ مەن كوممۋنالدىق قىزمەتتەرگە اقى تولەۋگە – ءبىر جىل ىشىندە 15-تەن 30 اەك (55،3-دەن 110،7 مىڭ تەڭگەگە دەيىن) مولشەرىندە قاراجات.
جىل باسىنان بەرى 2 624 قانداسقا ءتۇرلى قولداۋ شارالارى كورسەتىلگەن، سونىڭ ىشىندە 794 ادام تۇراقتى جۇمىسقا ورنالاسقان