زامانداستارىمىز الەمگە تانىلىپ، نوبەل سىيلىعىن الىپ جاتىر.
سىنشى، ادەبيەتتانۋشى امانگەلدى كەڭشىلىك ۇلى بيىل ادەبيەت سالاسى بويىنشا نوبەل سىيلىعىن العان وڭتۇستىككورەيالىق جازۋشى حان گانگتىڭ شىعارماشىلىعى تۋرالى پىكىر ءبىلدىردى، دەپ حابارلايدى aqshamnews.kz
«قوش. سونىمەن 2024 جىلعى ادەبيەت سالاسىنداعى نوبەل سىيلىعى مەنەن ەكى جاس كىشى زامانداسىم وڭتۇستىككورەيالىق جازۋشى حان گانعا بۇيىردى. وسىدان سەگىز جىل بۇرىن 2016 جىلى ول «ەت جەمەيتىن ايەل» رومانى ءۇشىن بۋكەر سىيلىعىن العان ەدى. جاڭالىقتى ەستي سالىسىمەن ليترەس كنيگي سايتىنان حان گاننىڭ ەكى كىتابىن «چەلوۆەچەسكيە پوستۋپكي» (ادامدىق ارەكەتتەر) جانە «ۆەگەتاريانكا» (ەت جەمەيتىن ايەل) تاۋىپ الىپ، ءتۇنى بويى ۇيىقتاماي وقىپ شىقتىم. بۇل جولعى نوبەل سىيلىعى ءوز يەسىن تاۋىپ، لايىقتى جازۋشىعا بەرىلگەن ەكەن»، – دەپ جازدى امانگەلدى كەڭشىلىك ۇلى ءوزىنىڭ فب پاراقشاسىنا.
سىنشىنىڭ جازۋىنشا، «ەت جەمەيتىن ايەل» رومانى وتە شەبەر جازىلعان.
«ماعان حان گاننىڭ «ەت جەمەيتىن ايەل» رومانى قاتتى ۇنادى. شىعارمانىڭ وقيعاسى قاراپايىم عانا. ءبىر ايەل تۇندە قورقىنىشتى ءتۇس كورىپ، ەت جەۋدەن باس تارتادى. مىنە، وسى كەزدەن ونىڭ كۇيەۋىمەن، قوعامداعى ادامدارمەن قارىم-قاتىناسى كۇردەلەنە تۇسەدى. رومان وتە شەبەر جازىلعان. شىعارما بىرەسە كۇيەۋىنىڭ اتىنان باياندالىپ، بىرەسە ايەلدىڭ كوزىمەن بەرىلەدى. اۆتور دەتالدارعا قاتتى ءمان بەرەدى. ءبىر ارتىق سويلەم جوق. ءستيلدىڭ نازىكتىگىنە قاراپ، اۆتوردىڭ ماتىنمەن كۇنى-تۇنى جۇمىس ىستەگەنىن تۇيسىگىڭمەن سەزەسىڭ. مىنا ەكى كىتاپتى وقىپ بولعاننان كەيىن وڭتۇستىك كورەيادان شىققان قالامگەرلەردىڭ تۋىندىلارىن وقۋعا دەگەن قۇلشىنىسىم ارتا ءتۇستى.
ەي، قازاقتار. زامانداستارىمىز الەمگە تانىلىپ، نوبەل سىيلىعىن الىپ جاتىر. ال، ءبىز الەۋمەتتىك جەلىگە جەلىمشە جابىسىپ الىپ، ءبىر-بىرىمىزدى وتىرىك ماقتاعانعا ءمازبىز. قاشان ەسىمىزدى جيىپ، ءوزىمىزدى قامشىلايمىز. الدە، ىشكەن-جەگەنىمىزگە عانا ءماز بولىپ، ءوز جازعاندارىمىزعا ءوزىمىز عانا تامسانىپ وسىلاي جۇرە بەرەمىز بە؟ ءومىر بولسا ءوتىپ بارادى»، – دەپ جازدى ول.