1 بولمەلى پاتەرلەر كوپ ساتىلعان
قىركۇيەك ايىندا تۇرعىن ءۇي نارىعىنداعى مامىلەلەر 1،6% ارتتى. بۇل تۋرالى ۇلتتىق ستاتيستيكا بيۋروسىنان ءمالىم ەتتى، دەپ حابارلايدى Almaty-akshamy.kz.
2022 جىلعى قىركۇيەكتە تۇرعىن ءۇيدى ساتۋ-ساتىپ الۋ بويىنشا 36 241 مامىلە جاسالدى، ونىڭ ىشىندە جەكە ۇيلەر – 8 905، كوپپاتەرلى ۇيلەر – 27 336. تامىز ايىمەن سالىستىرعاندا (35 686) باسپانانى ساتۋ-ساتىپ الۋ 1،6% ارتتى. مامىلەلەر سانى بويىنشا ءالى دە استانا (6 347) مەن الماتى (6 342) قالالارى كوش باستاپ تۇر. جىلجىمايتىن نارىقتاعى ەڭ از كەلىسىمشارت ۇلىتاۋ وبلىسىندا جاسالعان – 372.
قازاقستاندىقتاردى كوبىنە كوپقاباتتى ۇيدەگى باسپانا قىزىقتىرادى. قىركۇيەك ايىندا ولار بويىنشا بارلىعى 27 336 مامىلە جاسالدى، بۇل جالپى كورسەتكىشتىڭ 75،4%.
بولمەلەر سانىنا كەلسەك، قاتارىنان ەكى اي بويى 1 بولمەلى پاتەرلەر كوپ ساتىلعان. قىركۇيەك ايىندا ءبىر بولمەلى 10 163 پاتەر رەسىمدەلدى، ولار بويىنشا ساۋدانىڭ 55،4% استانا جانە الماتى قالالارىنا تيەسىلى. ەكى بولمەلى پاتەر بويىنشا 10 083 مامىلە جاسالدى.
2022 جىلدىڭ تامىزىمەن سالىستىرعاندا جەكە ۇيلەردى ساتۋ كورسەتكىشى تومەندەگەن. تومەندەۋ ديناميكاسى قىزىلوردا (-26،7%)، الماتى ( -12،3%) جانە باتىس قازاقستان وبلىستارىندا(-11،3%) بايقالدى. جەكە ۇيلەر ساۋداسىنىڭ ءوسىمى كەرىسىنشە، شىمكەنت قالاسىندا (+11،6%)، اقتوبە (+9،8%)، شىعىس قازاقستان (+9،6%)، جامبىل (+7،9%) جانە پاۆلودار وبلىستارىندا (+8،5%) تىركەلدى.