2023 جىلدان باستاپ مەملەكەت باسشىسىنىڭ باستاماسىمەن جاڭا فورماتتاعى كوشباسشىلاردى ىرىكتەۋ مەن وقىتۋعا باعىتتالعان «ءبىلىم بەرۋدەگى وزگەرىستەردىڭ 1000 كوشباسشىسى» جوباسى جۇزەگە اسىرىلۋدا.
باعدارلامانىڭ ءبىرىنشى جىلىندا 207 قاتىسۋشى رەسپۋبليكالىق كادر رەزەرۆىنە الىندى، ونىڭ 180ء-ى مەملەكەتتىك ءبىلىم بەرۋ ۇيىمدارىنىڭ باسشىلارى بولىپ تاعايىندالدى، دەپ حابارلايدى aqshamnews.kz.
ال 2024 جىلى اياقتالعان ەكىنشى لەكتىڭ ناتيجەسىندە 376 پەداگوگ قابىلداندى. ولاردىڭ 50ء-ى مەكتەپ ديرەكتورى، 40-قا جۋىعى ديرەكتوردىڭ ورىنباسارى قىزمەتىنە كىرىسىپ كەتتى.
جوباعا قاتىسۋشىلاردىڭ ءبىرى - مەيرام بەكتەمىروۆ. پەتروپاۆل قالاسىنداعى قالالىق مەكتەپتە جۇمىس ىستەگەننەن كەيىن 2025 جىلدىڭ قاڭتارىندا سولتۇستىك قازاقستان وبلىسى قىزىلجار اۋدانىنداعى اۋىلدىق مەكتەپتىڭ ديرەكتورىنا تاعايىندالدى.
«مەن جوبا تۋرالى وتكەن جىلى ءبىلىپ، بەلسەندى تۇردە دايىندالا باستادىم. بۇل پەداگوگتەر ءۇشىن ۇلكەن مۇمكىندىك. ىرىكتەۋدىڭ بارلىق كەزەڭدەرىنەن سۇرىنبەي ءوتتىم. بايقاۋدىڭ كاسىبي شەبەرلىكتى عانا باعالاپ قويماي، كۇندەلىكتى تاپسىرمالارعا جاڭاشا كوزقاراسپەن قاراۋعا كومەكتەسەتىنىن ءتۇسىندىم. بۇل تاجىريبە باسقا تاسىلدەردى ويلاپ تابۋعا جانە كاسىبيلىگىمدى بايىتۋعا مۇمكىندىك بەردى. بۇگىنگى تاڭدا مەكتەبىمىزدە وقۋ ۇدەرىسىن ۇيىمداستىرۋدى ايتارلىقتاي جەڭىلدەتەتىن ASC Timetable جۇيەسىن پايدالانا وتىرىپ، يننوۆاسيالىق جوسپارلاۋ باعدارلاماسى ەنگىزىلۋدە. وڭىردەگى ارىپتەستەرىممەن تاجىريبەمدى بولىسەمىن،- دەدى مەيرام بەكتەمىروۆ.
ايتا كەتەيىك، ق ر وقۋ-اعارتۋ مينيسترلىگى مەملەكەت باسشىسىنىڭ تاپسىرماسىمەن 2023 جىلدان باستاپ پرەزيدەنتتىك جاستار كادرلىق رەزەرۆىنىڭ ۇلگىسىمەن جوبانى جۇزەگە اسىرۋدا. 2024 جىلى جوباعا قاتىسۋعا نيەت بىلدىرۋشىلەر سانى الدىڭعى جىلعا قاراعاندا 2،5 ەسەگە ارتقان. باعدارلاماعا بالاباقشا، مەكتەپ جانە كوللەدج مۇعالىمدەرى قاتىسۋدا.
ىرىكتەۋ بەس كەزەڭ بويىنشا ءوتتى: كاسىبي جانە باسقارۋشىلىق قۇزىرەتتەردى باعالاۋ بويىنشا تەستىلەۋ، وقۋ، ەلىمىزدىڭ جەتەكشى مەكتەپتەرىندە تاعىلىمدامادان ءوتۋ، قورىتىندى باعالاۋ جانە رەسپۋبليكالىق كوميسسيادان اڭگىمەلەسۋدەن ءوتۋ.