بيلەت العاندا بايقاڭىز

«قازاقستان تەمىر جولى» «ايەلدەر» ۆاگوندارىنا بيلەتتەر ساتىلىمىن ىسكە قوستى

«جولاۋشىلار تاسىمالى» اق بيلەتتەردى ەلەكتروندىق ساتۋ جۇيەسىن تۇراقتى تۇردە جەتىلدىرىپ وتىرادى. اعىمداعى جىلدىڭ 10 قازانىنان باستاپ كومپانيا ايەل ادامدار ءۇشىن جول ءجۇرۋ قۇجاتتارىن (بيلەتتەردى) رەسىمدەۋ بويىنشا جاڭا قىزمەتتى ىسكە قوستى، دەپ حابارلايدى almaty-akshamy.kz «قازاقستان تەمىر جولى» باسپا ءسوز قىزمەتىنە سىلتەمە جاساپ.

جوبانى ىسكە اسىرۋ ءۇشىن №77/78 «الماتى – ماڭعىستاۋ» جانە №351/352 «الماتى-1 – وسكەمەن» جولاۋشىلار پويىزدارىندا ءبىر كۋپە ۆاگونى ىسكە قوسىلدى. BILET.RAILWAYS.KZ سايتىندا نەمەسە «جولاۋشىلار تاسىمالى» اق بيلەت كاسسالارىندا تەمىر جول بيلەتتەرىن راسىمدەۋ كەزىندە «جن» (ايەلدەر) بەلگىسى بولعان جاعدايدا بۇل ۆاگون تەك قانا ايەل جىنىستى جولاۋشىلارعا (تولىقتاي ۆاگونعا) بيلەت ساتۋعا ارنالعاندىعىن بىلدىرەدى.

سوندىقتان ەر جولاۋشىلار پويىز بيلەتتەرىن ساتىپ العاندا اباي بولۋ كەرەك. بۇل رەتتە اتالعان ۆاگونعا ەرىپ جۇرەتىن ادام بولعان كەزدە 7 جاسقا دەيىنگى ەر جىنىستى بالالاردى رەسىمدەۋگە رۇقسات ەتىلەدى.

ءبىرىنشى رەيسكە (№77 – 58پ. پويىزى، №351– 34پ. پويىزى) اعىمداعى جىلدىڭ 10-شى قازانىندا «ايەلدەر»  ۆاگونىنا 92 جولاۋشىنىڭ جول ءجۇرۋ قۇجاتتارى (بيلەتتەرىن) راسىمدەلدى.

ايەل  جولاۋشىلار تاراپىنان وسى قىزمەتكە سۇرانىس بولعان جاعدايدا كومپانيا قازاقستان ىشىندەگى باعىتتاردىڭ اۋقىمىن كەڭەيتۋگە جانە ءوز كليەنتتەرى تاراپىنان ۇسىنىستارعا دايىن.