مەگاپوليس تورىندە ورتالىق ازيا ەلدەرىنىڭ كوشباسشى قىز-كەلىنشەكتەرى، بيىكتەردى باعىندىرعان ايەل-انالار BeWoman دەپ ايدار تاعىلعان فورۋمدا باس قوستى. سالتاناتتى جيىن شىمىلدىعىن اشقان الماتى قالاسى اكىمىنىڭ ورىنباسارى ازامات قالدىبەكوۆ فورۋم قوناقتارى مەن قاتىسۋشىلارىنا شاھار باسشىسى ەربولات دوسايەۆتىڭ قۇتتىقتاۋ-لەبىزىن جەتكىزدى. اياۋلى جاندارعا باقىت، تابىس تىلەپ، اتالعان فورۋمنىڭ جەتىستىككە جەتۋ، كوشباسشى بولۋ جولدارىن ۇيرەتەتىن، جاڭا يننوۆاسيالاردى ۇسىناتىن، الەۋمەتتىك پروگرەستى جانە تەڭدىك ماسەلەلەرىن تالقىلايتىن ماڭىزدى پلاتفورما بولاتىنىنا سەنىم ءبىلدىردى.
ال ق ر مادەنيەت جانە اقپارات ءمينيسترى، ق ر پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ ءتوراعاسى ايدا بالايەۆا ونلاين-قۇتتىقتاۋىندا ايەل-انالاردىڭ قوعامداعى ورنى تۋرالى ايتا كەلىپ، فورۋم جۇمىسىنا ساتتىلىك تىلەدى.
فورۋمدا ورتالىق ازيا مەن الەمنىڭ 20 مەملەكەتىنەن 50-گە جۋىق سپيكەر ءسوز سويلەدى. ۇلكەن اۋديتوريانى باۋراپ العانداردىڭ ىشىندە امەريكالىق كاسىپكەر جانە Tesla كومپانياسىنىڭ قۇرىلتايشىسى يلون ماسكتىڭ اناسى مەي ماسك، رەسەيدىڭ تانىمال ءجۋرناليسى كسەنيا سوبچاك، Wildberries ماركەتپلەيسىنىڭ نەگىزىن قالاۋشى تاتيانا كيم بار.
ءوزىمىزدىڭ وتاندىق كوشباسشى ايەل-انالار – «انالار ءۇيى» قوعامدىق قورىنىڭ اتقارۋشى كوميتەتىنىڭ ءتوراعاسى، IQanat High School of Burabay مەسەناتى انار راحيمبايەۆا، كاسىپكەر، dos Community زياتكەرلىك ۆولونتەرلىك پلاتفورماسىنىڭ ءبىلىم بەرۋ جوبالارىنىڭ ديرەكتورى ءجانيا قۇرمانوۆا، قازاقستاندىق فيلانتروپ، ەكولوگ، قوعام قايراتكەرى، «ءسابي» قايىرىمدىلىق قورىنىڭ پرەزيدەنتى اسەل تاسماعامبەتوۆا قوعامعا ەلەۋلى پايداسى ءتيىپ جاتقان الەۋمەتتىك جوبالارىنىڭ ارتىقشىلىقتارىن، جەتىستىكتەرىن ايتىپ بەردى. ال ايگىلى ديماش قۇدايبەرگەننىڭ اناسى، ونەر قايراتكەرى سۆەتلانا ايتبايەۆا دارىندى بالا تاربيەلەۋ قۇپياسىمەن بولىسسە، Bilim media group نەگىزىن قالاۋشى جانە باس ديرەكتورى راۋان كەنجەحان ۇلى بيىكتەردى باعىندىرۋدا اناسىنىڭ ءرولى قانداي بولعانىن اسەرلى اڭگىمەلەپ بەردى.
«ءوزىڭىزدىڭ ماقساتتارىڭىز بەن سۇيىكتى ءىسىڭىزدى تابىڭىز»، «جەكە برەند: ونى قالاي جاساۋ كەرەك جانە ول سىزگە نە ءۇشىن كەرەك؟»، «كەدەرگىلەردى ەڭسەرۋ: ارمانعا قالاي جەتۋگە بولادى؟» سياقتى ونداعان تاقىرىپتاردى قاۋزاعان BeWomاn 2024 فورۋمى تاجىريبە الماسۋعا جانە كاسىبي بايلانىستاردى كەڭەيتۋگە بىرەگەي مۇمكىندىك بەردى، سونداي-اق ورتالىق ازياداعى ايەلدەردىڭ كوشباسشىلىق الەۋەتىن اشۋعا جول كورسەتتى دەۋگە بولادى.