ازاماتتىق قورعاۋ قىزمەتتەرى اتىراۋ، اقتوبە، اقمولا، باتىس جانە سولتۇستىك قازاقستان وبلىستارىندا سۋ تاسقىنىنا قارسى ءىس-شارالاردى جالعاستىرىپ جاتىر. بۇل تۋرالى ق ر تجم وكىلى اسقار ءشارىپ باياندادى، دەپ حابارلايدى almaty-akshamy.kz.
«جايىق وزەنىنە سۋدىڭ كەلۋىنە بايلانىستى اتىراۋ وبلىسى ايرىقشا باقىلاۋدا. اتىراۋ قالاسىندا جايىق وزەنى بويىندا بوگەتتەردى نىعايتۋ جۇمىستارى ۇزدىكسىز جۇرگىزىلىپ جاتىر. دروننىڭ كومەگىمەن سۋ تاسقىنى جاعدايىنا مونيتورينگ جۇرگىزىلۋدە. بروننان شىعارىلعان جىلجىمالى سورعى ستانسيالارى سۋ باسقان اۋماقتاردان سۋ سورۋ جۇمىستارىنا جۇمىلدىرىلدى»، - دەدى ا.ءشارىپ ورتالىق كوممۋنيكاسيالار قىزمەتىندە.
سولتۇستىك قازاقستان، اتىراۋ جانە اقتوبە وبلىستارىندا 6 379 تۇرعىن ءۇي مەن 2 794 اۋلا اۋماعىنان سۋدىڭ باعىتى بۇرىلىپ، سۋ سورىلدى. رەسپۋبليكا بويىنشا 37 مىڭنان استام ادام ءوز ۇيلەرىنە ورالدى، 6 مىڭنان استام ادام ەۆاكۋاسيالاۋ پۋنكتتەرىندە ورنالاستى.
اۆاريالىق-قۇتقارۋ جانە سۋ تاسقىنىنا قارسى جۇمىستارعا 21 مىڭنان استام ادام، 2 مىڭنان استام ءتۇرلى تەحنيكا، 615 سۋ سورۋ جانە ءجۇزۋ قۇرالى، 8 اۋە كەمەسى جۇمىلدىرىلدى.
«سۋ تاسقىنى باستالعالى بەرى 12 ملن استام تەكشە مەتر ەرىگەن قار سۋى سورىپ شىعارىلدى، 6،6 ملن استام قاپشىق جانە 1،5 ملن استام توننا ينەرتتى ماتەريال توسەلدى. جالپى ازاماتتىق قورعاۋ قىزمەتتەرى اتىراۋ، اقتوبە، اقمولا، باتىس جانە سولتۇستىك قازاقستان وبلىستارىندا سۋ تاسقىنىنا قارسى ءىس-شارالار جۇرگىزىپ جاتىر»، - دەدى سپيكەر.