وسى اپتادا ۇقك شەكارا قىزمەتى الماتى وبلىسى بويىنشا دەپارتامەنتىنە قاراستى قاراساي اۋدانىنىڭ شەكارا باسقارماسىنا قاراستى اقجارداعى تەحنيكالىق جانە كاسىبي دايارلىق بولىمىندە ساربازدارعا ارنالعان كورسەتىلىم ساباعى ءوتتى.
جىلداعى ءداستۇر بويىنشا «كۇز-2024» شاقىرىلىمىنىڭ ساربازدارىنا شەكارا قىزمەتىنىڭ قولدانىسىنداعى تەحنيكالار، قارۋ-جاراقتار، بايلانىس قۇرالدارى جانە ازىق-تۇلىك كورمەسى ۇسىنىلدى. بۇل شارانى شەبەر ۇيىمداستىرعان «قاسكەلەڭ» شەكارا بولىمشەسىنىڭ تاربيە جانە يدەولوگيالىق جۇمىستار جونىندەگى ورىنباسارى، اعا لەيتەنانت ا.تۇراروۆ باستاعان شەكاراشىلار بولدى. سونىمەن قاتار، ارنايى ماقساتتاعى ۇتقىر ءىس-قيمىلدار توبىنىڭ جاۋىنگەرلەرى قۇقىق بۇزۋشىلاردى ۇستاپ، ولاردىڭ الىسقا كەتۋىنە مۇمكىندىك بەرمەيتىن شەبەرلىكتەرىن كورسەتتى.
شەكارا باسقارماسى باستىعىنىڭ ورىنباسارى، تەحنيكالىق جانە كاسىبي دايارلىق ءبولىمىنىڭ باستىعى پودپولكوۆنيك ساعادات اۋەزوۆ بۇل شارانىڭ جاس ساربازدار ءۇشىن ماڭىزىن اتاپ ءوتتى. وسىدان كەيىن 500-دەن استام ساربازعا ارنالعان كورسەتىلىم ساباعى باستالىپ، بولاشاق شەكاراشىلار بەس توپقا ءبولىنىپ، بەس نۇكتەگە باردى.
ءبىرىنشى نۇكتە – تەحنيكالار. مۇندا شەكارالىق قىزمەتتە قولدانىلاتىن «كاماز»، جول تالعامايتىن «ۋاز»، ارنايى ماقساتتاعى جاۋىنگەرلىك تاپسىرمالارعا ارنالعان بروندالعان كولىكتەر تانىستىرىلدى. ساربازدار وسى تەحنيكالاردى كورىپ، ولاردىڭ شەكارا قىزمەتىندەگى ءرولىن جاقسى ءتۇسىندى.
ەكىنشى نۇكتە – ازىق-تۇلىك كورمەسى. مۇندا ساربازدار ءارتۇرلى كوكونىس پەن ازىق-تۇلىكتىڭ قويىلعان كورمەسىن كورىپ، قاجەتتى مالىمەتتەرمەن تانىستى.
ءۇشىنشى نۇكتە – قارۋ-جاراقتار كورمەسى. اۆتوماتتار، تاپانشالار جانە سنايپەر ۆينتوۆكالارى سەكىلدى شەكارانى كۇزەتۋگە ارنالعان قارۋلاردى شەبەر نۇسقاۋشىلار تانىستىردى، ءارى جاس ساربازدارعا شەبەرلىك ساباقتارىن دا كورسەتتى.
ءتورتىنشى نۇكتە – بايلانىس قۇرالدارى. شەكارا قىزمەتىندە بايلانىس قۇرالدارىنىڭ ماڭىزى ەرەكشە. ساربازدار زاماناۋي بايلانىس قۇرالدارىنىڭ جۇمىسىن ۇيرەنىپ، ولاردىڭ پايدالانۋ ەرەجەلەرىن ءتۇسىندى. ءتىپتى، ساربازداردىڭ ءبىرى راسيا ارقىلى ءوزىنىڭ اۋىلىنا حابارلاسىپ، قالعاندارىن كۇلكىگە بولەدى.
بەسىنشى نۇكتە – ارنايى ماقساتتاعى شەكاراشىلار توبىنىڭ كورسەتىلىمى. ارنايى جاساقتىڭ كۇردەلى تاپسىرمالاردى ورىنداۋ بارىسىنداعى قيمىلدارى ساربازدارعا ەرەكشە اسەر ەتتى.
بۇل شارا جاس ساربازداردى الداعى انت قابىلداۋ راسىمىنە دايىنداپ، شەكارا قىزمەتىندەگى ومىرگە بەيىمدەۋگە ۇلكەن ۇلەس قوستى. «كۇز-2024» شاقىرىلىمىنىڭ ساربازدارى الداعى كۇندەرى تەر توگىپ، شەكاراشىلىق قىزمەتكە تولىققاندى دايىندىق جاسايدى.