ءماجىلىس عيماراتىندا پارلامەنت پالاتالارىنىڭ بىرىككەن وتىرىسى ءوتىپ جاتىر. وتىرىستا كونستيتۋسيالىق سوتتىڭ ءتوراعاسى ەلۆيرا ءازىموۆا ق ر كونستيتۋسيالىق سوتىنىڭ «قازاقستان رەسپۋبليكاسىنداعى كونستيتۋسيالىق زاڭدىلىقتىڭ جاي-كۇيى تۋرالى» جولداۋى جونىندە باياندادى، دەپ حابارلايدى Almaty-akshamy.kz.
ونىڭ سوزىنشە، بيىل بەس ايدا 3000-نان استام ازامات ءوز قۇقىقتارىن كونستيتۋسيالىق قورعاۋعا جۇگىندى.
«بۇل سيفرلار ازاماتتاردىڭ جاڭا ورگانعا دەگەن جاي عانا قىزىعۋشىلىعىنىڭ دالەلى بولىپ تابىلمايدى، ءوتىنىش بەرۋشىلەردىڭ ءارقايسىسىنىڭ ءوز قۇقىقتارىن قورعاۋ نيەتىن راستايدى. بۇل رەتتە قازاقستان زاڭناماسىندا كونستيتۋسيالىق سوتقا جۇگىنگەنگە دەيىن قۇقىقتىق قورعاۋدىڭ بارلىق باسقا قۇرالدارىن قولدانۋ تۋرالى تالاپ جوق»، - دەدى ەلۆيرا ءازىموۆا.
كەلىپ تۇسكەن وتىنىشتەردىڭ جارتىسىنا جۋىعى (شامامەن 41%) سوت شەشىمدەرىمەن كەلىسپەۋگە قاتىستى. ءتوراعانىڭ سوزىنشە، بۇل رەتتە كونستيتۋسيالىق سوت سوت شەشىمدەرىنە باعا بەرۋگە قۇقىلى ەمەس ەكەنىنە نازار اۋدارۋ كەرەك.
«ازاماتتاردان كەلىپ تۇسكەن وتىنىشتەردىڭ ءبىر بولىگى سوت اكتىلەرىنىڭ ورىندالماۋىنا، تۇرعىن ءۇي جانە ەڭبەك قاتىناستارىنا، الەۋمەتتىك قورعاۋعا، جازالاردىڭ ورىندالۋىنا، اقپاراتقا قول جەتكىزۋگە، جەكە تۇلعالاردىڭ بانكروتتىعىنا جانە تاعى باسقالارعا قاتىستى. وتىنىشتەردىڭ تورتتەن بىرىندە عانا (26%) ازاماتتار زاڭدار مەن باسقا دا نورماتيۆتىك قۇقىقتىق اكتىلەردىڭ كونستيتۋسيالىلىعىن تەكسەرۋدى سۇرايدى. 20 ءوڭىر بولىنىسىندە ەڭ كوپ وتىنىشتەر استانا، الماتى قالالارى مەن قوستاناي وبلىسىنىڭ تۇرعىندارىنان كەلىپ ءتۇستى. وتىنىشتەردى قاراۋ قورىتىندىسى بويىنشا كونستيتۋسيالىق سوت رەسپۋبليكاداعى كونستيتۋسيالىق زاڭدىلىقتىڭ جاي-كۇيى تۋرالى جىل سايىنعى جولداۋىن ۇسىنۋعا مىندەتتى»،-دەيدى ق ر كونستيتۋسيالىق سوتىنىڭ ءتوراعاسى.
ەلۆيرا ءازىموۆانىڭ ايتۋىنشا، وسى كەزەڭدەگى كونستيتۋسيالىق ءىس جۇرگىزۋ قورىتىندىسى بويىنشا، وكىنىشكە قاراي، جەكەلەگەن نورماتيۆتىك قۇقىقتىق اكتىلەردە ەلەۋلى ولقىلىقتاردىڭ بار ەكەنى انىقتالدى.
«قابىلدانعان ون سەگىز نورماتيۆتىك قاۋلىنىڭ بەسەۋىندە نورمالار كونستيتۋسيالىق ەمەس دەپ تانىلدى. تاعى بەسەۋى بويىنشا كونستيتۋسيالىق سوت بىركەلكى قۇقىق قولدانۋ ماقساتىندا ءتيىستى نورمالارعا تۇسىندىرمە بەردى. ءقازىر ۇكىمەت پەن مۇددەلى ورگاندارعا قاجەتتى شارالار قابىلداۋ ۇسىنىلدى»، - دەدى ءتوراعا.