وتاندىق ءفيلمنىڭ سيۋجەتى سپورتتا ۇلكەن جەتىستىككە جەتۋدى ارمانداعان شاڭعىشىنىڭ ءومىرى جايىندا.
الايدا، اپاتتىڭ سالدارىنان باستى كەيىپكەر مانسابىن جالعاستىرۋ مۇمكىندىگىنەن مۇلدەم ايرىلادى. وسىلايشا، ونىڭ ءومىرى پاراليمپياداشىلارمەن كەزدەسۋدەن كەيىن تۇبەگەيلى وزگەرەدى. سپورت جانرىنداعى تۋىندى كورەرمەندى سوڭىنا دەيىن قىزىعۋىشىلىق سەزىمىندە ۇستايدى. سەبەبى باستى كەيىپكەردىڭ ءومىر جولىندا كەزدەسكەن بارلىق قيىندىقتى ەڭسەرە مە جوق پا، ارمانىنا قولى جەتە مە بارلىعى سوڭىندا بەلگىلى بولادى، دەپ حابارلايدى Almaty-akshamy.kz.
«فيلمگە ءتانتى بولدىم. اۆتورلار شيەلەنىسكەن حيكايانى جان تولعانىستارىمەن ۇيلەستىرىپ، ءبىز كەيىپكەرلەرمەن بىرگە ۋايىمداپ وتىردىق. ولارمەن بىرگە بىردە قۋانىپ، بىردە مۇڭايىپ وتىردىق. مانساپ، وتباسى، دوستىق. مۇنىڭ ءبارى بار. كينو ماعان قاتتى اسەر ەتتى»، - دەدى كورەرمەن ماريە-كريستينە كنوپ.
كورسەتىلىمنەن كەيىن كورەرمەندەردى توسىن سىي كۇتتى. ءفيلمنىڭ پرەمەراسىنا ارنايى ءتۇسىرىلىم توبى كەلىپ، شەتەلدىك كورەرمەندەرمەن كەزدەستى. جۇزدەسۋ بارىسىندا ولار شىعارماشىلىق پروسەسس، تىس قالعان كادرلار مەن قيىندىقتار تۋرالى ايتتى.
«2018 جىلى ءپچونچحاندا پاراليمپيادادا التىن جۇلدە ۇتقان وتانداسىمىز الەكساندرا كوليادينمەن بولعان شىنايى وقيعادان شابىت الدىم. ءبىز ادامداردى ىنتالاندىراتىن كينو تۇسىرگىمىز كەلدى. كورگەننەن كەيىن ىزگى ىستەر جاساۋعا نيەتى بولسىن دەپ. ششۋچينسكتە تۇسىرگەندە قاتتى اياز تۇرىپ، كۇشتى جەلدەن دەكوراسيالارىمىز ۇشىپ كەتكەن. اسقار ءىلياسوۆ جۇقا جەيدەمەن تۇرعان. ول سپورتشىنىڭ تەك شاڭعى تەبۋىنە عانا ارنالعان. ال ءبىز ۇزاق ۋاقىت كوپ دۋبل تۇسىردىك قوي. ءبارىمىز ونى جىلىتىپ وتىردىق. وعان قوسا اكتەرلەرىمىزدىڭ كوبىسى شاڭعى تەبە المايتىن. وليمپيادا چەمپيونىمىز ەلەنا ءحرۋستالوۆا ءبىر ايدا ءبارىن ۇيرەتتى»، - دەيدى «پاراليمپياداشى» ءفيلمىنىڭ رەجيسسەرى الديار بايراقىموۆ.
«پاراليمپياداشى» ءفيلمى الەمدىك كورسەتىلىمىن باستادى. بەرلينگە دەيىن كارتينا تاشكەنتتە كورەرمەن نازارىنا ۇسىنىلدى. ەندى اۆتورلار ونى فرانسيا مەن اقش-تا كورسەتۋدى جوسپارلاپ وتىر.