شىمكەنت قالاسى اكىمىنىڭ ورىنباسارى رۋسلان بەردەنوۆكە قارۋلى شابۋىل جاسالدى. وقيعا 21 ساۋىردە قالالىق اكىمشىلىك عيماراتىنىڭ جانىندا بولعان. جەلىدە تاراعان اقپاراتتارعا سەنسەك وعان "سايگا-12" ماركالى اڭشى مىلتىعىنان ءۇش رەت وق اتىلعان. بۇل قارۋ تۋرالى نە بىلەمىز؟ اqshamnews.kz ءتىلشىسى تارقاتادى.
اتىلعان قارۋ تۋرالى اقپارات
"سايگا-12" ەكسپورتقا ءجيى شىعاتىن رەسەيلىك مىلتىقتاردىڭ ءبىرى. قارۋ قۇراستىرۋ پرينسيپتەرى جاعىنان AK-47-گە وتە ۇقساس. ول — جارتىلاي اۆتوماتتى 12-كاليبرلى شولاق مىلتىق. “سايگا” اتاۋى — رەسەيدەگى كيىك تۇرىنە بايلانىستى قويىلعان.
سۋرەت: Wikipedia.org
سايگا قارۋلارى العاشىندا اڭشىلارعا ارنالىپ جاسالعان. كەيىن سۇرانىسقا بايلانىستى تاكتيكالىق ۇلگىلەرى دە پايدا بولدى. اڭشىلىقتان بولەك سپورتتىق اتىسقا، (مىسالى، IPSC) ءوزىن-وزى قورعاۋعا، كەيبىر ەلدەردە ءتىپتى ارنايى جاساقتا دا قولدانىلادى.
قازاقستاندا "سايگا-12" مىلتىعىن كوبىنە اڭشىلىق ماقساتتا پايدالانادى. تەحنيكالىق جاعىنان ۇڭعىلى شولاق قارۋ بولعاندىقتان، قابان، بودەنە، ۇيرەك، قاز سياقتى اڭداردى اتۋعا قولايلى كەلەدى.
قازاقستاندا قارۋ ۇستاۋ ءتارتىبى قانداي؟
ەلىمىزدە قارۋ ۇستاۋ – ناقتى زاڭدىق تالاپتارعا ساي جۇرگىزىلەتىن پروسەسس. جەكە قورعانىس، اڭشىلىق پەن سپورت ءۇشىن رۇقسات ەتىلگەنىمەن، ونى ساقتاۋ، قولدانۋ جانە تىركەۋ ءتارتىبى قاتاڭ رەتتەلەدى. وسى تۋراسىندا زاڭگەر قۋات اۋعانبەكتەن ماڭىزدى ساۋالدارعا جاۋاپ الدىق.
زاڭگەر قازاقستاندا كامەلەتكە تولعان ەل ازاماتتارى اڭشىلىق، سپورت جانە ءوزىن-وزى قورعاۋ ماقساتىندا قارۋ يەلەنە الاتىنىن ايتتى. ياعني، 18 جاستان باستاپ – ساداق، اربالەت سەكىلدى لاقتىرىلاتىن قارۋلارعا رۇقسات بەرىلەدى. ال پنيەۆماتيكالىق قارۋ (قۋاتى 7،5 دج-دان اسپايتىن، كاليبرى 4،5 مم دەيىن) – تىركەۋسىز الۋعا بولادى. اڭشىلىق قارۋعا – ارنايى كۋالىگى بار ازاماتتار عانا قول جەتكىزە الادى.
«ماقساتتارىنا بايلانىستى ءبىر ادامعا بەلگىلەنگەن سانعا دەيىن عانا قارۋ ۇستاۋعا رۇقسات. ماسەلەن، اڭشىلىق ماقساتتا – 4 قارۋعا دەيىن (2 تەگىس، 2 ويىق ۇڭعىلى)، سپورتتىق ماقساتتا – 5 داناعا دەيىن، ءوزىن-وزى قورعاۋ ءۇشىن – ءار تۇرىنەن 2 قارۋدان ارتىق بولماۋى ءتيىس. ال قارۋ جوعالعان جاعدايدا ىشكى ىستەر ورگانىنا بىردەن حابارلاۋ قاجەت. قارۋدى جوعالتقان ادامعا 486-بابىنىڭ 1ء-بولىمى، 3-بولىگىنە ساي حاتتاما تولتىرىلىپ، ءتيىستى شارالار قولدانىلاتىن بولادى»، - دەيدى زاڭگەر.
سونداي-اق، زاڭگەر قارۋدى ۇيدە ساقتاۋدىڭ ارنايى ءتارتىبى بارىن ەسكەرتتى. ول ارنايى مەتالل سەيفتە ساقتالۋى كەرەك. ال سەيف قابىرعاعا نەمەسە ەدەنگە بەكىتىلۋى كەرەك.
زاڭسىز اينالىمداعى قارۋ جاراقتار.
قازاقستاندا سوڭعى جىلدارى قارۋ-جاراق قويمالارىنىڭ تونالۋى مەن زاڭسىز اينالىمى بويىنشا ناقتى ستاتيستيكا جاريالانباعان. دەسە دە، 2022 جىلعى قاڭتار وقيعاسى كەزىندە قارۋ-جاراق دۇكەندەرى مەن قويمالارىنان 2 960 بىرلىك قارۋ ۇرلانعانى بەلگىلى. بۇل تۋرالى ۇلتتىق قاۋىپسىزدىك كوميتەتىنىڭ باسپا ءسوز قىزمەتى حابارلاعان بولاتىن. وسى وقيعادان كەيىنگى جىلدارى قۇقىق قورعاۋ ورگاندارى قارۋ-جاراقتاردى ىزدەۋ جانە تاركىلەۋ جۇمىستارىن بەلسەندى جۇرگىزىپ كەلەدى.
«سوڭعى ەكى جىلدا ۇيىمداسقان قىلمىسقا قارسى كۇرەس بولىنىستەرى زاڭسىز اينالىمنان 1000-نان استام قارۋ-جاراق تاركىلەدى، ونىڭ ىشىندە قاڭتار وقيعاسى كەزىندە ۇرلانعان 130 قارۋ بار. بۇل باعىتتاعى جۇمىس ىشكى ىستەر مينيسترلىگىنىڭ ەرەكشە باقىلاۋىندا» دەپ حابارلادى ءىىم باسپا ءسوز قىزمەتى.
ەسكە سالايىق، 21 ءساۋىر كۇنى شىمكەنت قالاسى اكىمىنىڭ ورىنباسارى رۋسلان بەردەنوۆكە جاسالعان شابۋىل فاكتىسى بويىنشا قىلمىستىق ءىس قوزعالعان بولاتىن. شابۋىل جاساعان ادام اكىمدىك عيماراتىنىڭ جانىندا شەنەۋنىكتى كۇتىپ تۇرعان. ول سىرتقا شىققان ساتتە، جاقىن قاشىقتان "سايگا-12" ماركالى اڭشى مىلتىعىنان ءۇش رەت وق اتقان.
بەردەنوۆكە 4 ساعات وتا جاسالىپ، ناۋقاستىڭ قازىرگى جاعداي تۇراقتالعانى ايتىلدى. سونداي-اق اكىمدىك شابۋىل جاساعان ادامنىڭ ۇستالىپ، ۋاقىتشا ۇستاۋ يزولياتورىنا قامالعانىن ءمالىم ەتتى.