نۋمەرولوگ 2022 جىل ەكونوميكالىق قۇلدىراۋ مەن توقىراۋعا ۇشىراۋى مۇمكىن ەكەنىن ايتتى
ساناۋلى كۇنەن ەلىمىز 2022 جىلعا اياق باسادى. قازاقتىڭ جىل ساناۋى بويىنشا 2022 جىلى بارىس جىلى كىرەدى. ءار جىلدىڭ وزىندىك ەرەكشەلىگى، الىپ كەلەر نەسىبەسى بار. 2022 جىل نەسىمەن ەرەكشە؟
پسيحولوگ، تەلە جانە راديوجۇرگىزۋشى، بەلگىلى قازاقستاندىق نۋمەرولوگ ايسۇلۋ احيموۆا الداعى جىلعا بولجام جاسادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ونىڭ ايتۋىنشا، كەلەر جىلدىڭ سانى – «6».
«2022 جىل كوپ ادامدى توزىمدىلىككە، شىدامدىلىققا سىنايتىن جىل بولماق. نۋمەرولوگيادا «6» - بۇل كۇشتى سان. نەگىزگى سيپاتتامالار قارجى، ءال-اۋقات. سونىمەن قاتار، ەڭبەكقورلىقپەن بايلانىستى بولادى. اقىلعا قونىمدى شەشىمدەر مەن لوگيكا، سەنىمدىلىك پەن باتىلدىق جىلى»، - دەيدى نۋمەرولوگ.
بۇل جىلى اسىرەسە جۇمىسقا جانە كەز كەلگەن باستامالارعا كۇش سالۋ كەرەك. ساتتىلىككە نەمەسە كەزدەيسوقتىققا سەنۋگە بولمايدى.
نۋمەرولوگ 2022 جىل ەكونوميكالىق قۇلدىراۋ مەن توقىراۋعا ۇشىراۋى مۇمكىن ەكەنىن ايتتى. سوندىقتان ازاماتتاردى شىعىندارعا ساق بولۋعا جانە ناقتى تالداۋعا سايكەس ارەكەت ەتۋگە شاقىردى.
«بۇل جىل جالقاۋلىقتى كەشىرمەيدى، اسپاندا قالىقتاۋدىڭ قاجەتى جوق. قيالعا بەرىلمەڭىز. اگرەسسيا مەن نەمقۇرايلىلىقتان اۋلاق بولىڭىز»، - دەدى ول.
نۋمەرولوگ ماڭىزدى باستاما باستاماس بۇرىن ءبىر ستاكان تازا سۋ ءىشىپ الۋ كەرەك ەكەنىن تىلگە تيەك ەتتى.
«ەگەر سىزگە شۇعىل تۇردە ماڭىزدى ماسەلەنى شەشۋ قاجەت بولسا، ستاكانعا تازا اۋىز سۋ قۇيىڭىز، سوسىن وتىرىپ بىرنەشە باياۋ جۇتىم جاساڭىز. سول كەزدە ءسىزدى مازالاپ جۇرگەن سۇراقتار جاقىن ارادا شەشىلىپ، كەنەتتەن جاڭا ويلار پايدا بولادى»،- دەيدى ايسۇلۋ احيموۆا.
ايسۇلۋ احيموۆانىڭ ايتۋىنشا، جاڭا جىلدا قىزمەتتىڭ ءجيى اۋىسۋى، قونىس اۋدارۋ بولادى.
«وسى جىلى دۇنيەگە كەلگەن سابيلەردى كىشكەنتايىنان شىدامدىلىققا، توزىمدىلىككە، ەڭبەككە باۋلۋ ماڭىزدى. گادجەتتەر مەن كومپيۋتەرلىك ويىندارعا شەكتەۋ قويۋ كەرەك. ولار ءۇشىن شاحمات جانە كونسترۋكتور ويىندارى پايدالى. 2022 جىلى شەت تىلدەرىن ۇيرەنۋگە، داعدىلارىڭىزدى جەتىلدىرۋگە جانە ءوزىڭىزدى تاربيەلەۋگە ۋاقىت ءبولىڭىز. اسىرەسە 2022 جىلدىڭ اقپانىنان باستاپ شەت تىلدەرىن ۇيرەنۋدى باستاۋ ءتيىمدى»، - دەدى ول.
نۋمەرلوگ دەنساۋلىققا قاتىستى دا ايتتى.
«بيىل باۋىر مەن قان اينالىمى جۇيەسىنىڭ جۇمىسىنا نازار اۋدارعان ءجون. تابيعاتقا ءجيى شىعىپ تۇرۋ كەرەك. يوگا، بي، فۋتبول جانە سەرۋەندەۋ پايدالى»، - دەپ تۇيىندەدى ايسۇلۋ احيموۆا.