ق ر پرەمەر-مينيسترى ولجاس بەكتەنوۆ باتىس قازاقستان وبلىسىنا جۇمىس ساپارى بارىسىندا ازىق-تۇلىك قاۋىپسىزدىگىن قامتاماسىز ەتۋ باعىتىندا اتقارىلىپ جاتقان جۇمىستاردىڭ بارىسىمەن تانىسىپ، ءوڭىردىڭ اگروونەركاسىپتىك كەشەنىن دامىتۋ تۋرالى بايانداما تىڭدادى.
«World Green Company» ج ش س كوكونىس وسىرەتىن جىلىجاي كەشەنىنە بارعان ۇكىمەت باسشىسى ونداعى تەحنولوگيالىق ۇدەرىسپەن تانىسىپ، دايىن ونىمدەردى قاراپ شىقتى.
جىلىجاي اۋماعىندا كوكونىس وسىرۋگە بارلىق قاجەتتى جاعداي جاسالعان: سۋارۋ، جەلدەتۋ، كولەڭكەلەۋ، ىلعالداندىرۋ، سالقىنداتۋ، جىلىتۋ جانە باسقا دا جۇيەلەر جۇمىس ىستەيدى، ءبىر جىلدا مۇندا 6 مىڭ توننادان استام قيار مەن قىزاناق وندىرىلەدى.
«ءبىزدىڭ جىلىجايىمىز – گوللانديالىق ءتورتىنشى بۋىن تەحنولوگياسىمەن سالىنعان جانە بارلىق زاماناۋي ەلەمەنتتەردى قامتيتىن جوعارى تەحنولوگيالىق جوبا. قازىرگى تاڭدا 190 ادامدى تۇراقتى جۇمىسپەن قامتىپ وتىرمىز، ولاردىڭ بارلىعى وبلىسىمىزدىڭ تۇرعىندارى. ونىمدەر جەرگىلىكتى نارىققا شىعارىلادى، سونىمەن قاتار قازاقستاننىڭ كورشىلەس وبلىستارى مەن رەسەيدىڭ جاقىن ايماقتارىندا سۇرانىسقا يە»، — دەدى كاسىپورىن باسشىسى مۇرات يبراگيموۆ.
ەلىمىزدەگى ونەركاسىپتىك جىلىجايلاردىڭ جالپى اۋدانى بۇگىندە 223،1 گا قۇرايدى، ينۆەستيسيالىق سۋبسيديالاۋ قاعيدالارى شەڭبەرىندە جىلىجاي بيزنەسىن ىنتالاندىرۋ ءۇشىن شىعىستاردى وتەۋ 25%-دان 30%-عا دەيىن ۇلعايتىلدى. سونداي-اق تىڭايتقىشتار، وسىمدىكتەردى قورعاۋ قۇرالدارى، ەگىندىك سۋى، قيار جانە قىزاناق تۇقىمدارى قۇنىنىڭ 50%-ى سۋبسيديالانادى.
پرەمەر-مينيستر ىشكى نارىقتى وتاندىق اۋىل شارۋاشىلىعى ونىمدەرىمەن قامتاماسىز ەتۋدىڭ ماڭىزدىلىعىنا نازار اۋداردى.
«مەملەكەت باسشىسى اۋىل شارۋاشىلىعىن دامىتۋدى قولدايدى. بيىل اوك قولداۋ شارالارى اياسىندا 430 ملرد تەڭگە قاراستىرىلدى. الايدا، پرەزيدەنتتىڭ تاپسىرماسى بويىنشا ءبىز بۇل سومانى ەكى ەسەگە ارتتىرامىز. سوندىقتان بىزدە اۋىل شارۋاشىلىعى ءوندىرىسىنىڭ كولەمىن ۇلعايتۋ پەرسپەكتيۆاسى جوعارى، ەندى بەلسەندى جۇمىس ىستەۋ قاجەت. مەملەكەت تاراپىنان قاجەتتى كومەك كورسەتىلەدى»، — دەدى ولجاس بەكتەنوۆ.
سونداي-اق مۇندا ۇكىمەت باسشىسىنا ينۆەستيسيا كولەمى شامامەن $2،4 ملرد قۇرايتىن، قۋاتتىلىعى 6 ملن توننا كاليي تىڭايتقىشتارىن وندىرەتىن قازاقستانداعى تۇڭعىش تاۋ-كەن بايىتۋ كەشەنىن سالۋ جوباسى تانىستىرىلدى. بۇگىنگى تاڭدا ەلىمىزدە مۇنداي تىڭايتقىشتارعا ورتاشا قاجەتتىلىك جىلىنا 18 مىڭ توننانى قۇرايدى. زاۋىت 2035 جىلعا دەيىن كەزەڭ-كەزەڭىمەن ىسكە قوسىلادى. «Qazaq Kalium Ltd.» قۇرىلتايشىسى نۇرلان ارتىقبايەۆتىڭ ايتۋىنشا، كاسىپورىن اشىلعاننان كەيىن قازاقستان الەمدىك نارىقتاعى ءوندىرىس ۇلەسىنىڭ 14%-ىن قامتي وتىرىپ، كاليي تىڭايتقىشتارىن الەمدىك وندىرۋشىلەردىڭ ۇزدىك توپ-5-نە كىرەدى. جوبا اياسىندا 4 مىڭ تۇراقتى جۇمىس ورنى قۇرىلادى.
ايتا كەتۋ كەرەك، باتىس قازاقستان وبلىسى – يندۋستريالدى-اگرارلىق ءوڭىر. 2023 جىلى اۋىل شارۋاشىلىعى جالپى ءونىمىنىڭ كولەمى 305،5 ملرد تەڭگەنى قۇرادى. وتكەن جىلى 310 مىڭ توننا ءداندى داقىلدار، 81،2 مىڭ توننا مايلى داقىلدار، 61،7 مىڭ توننا كوكونىس ءوندىرىلدى. بۇگىنگى تاڭدا وبلىستا سىيىمدىلىعى 52،3 مىڭ توننا بولاتىن 32 كارتوپ-كوكونىس قويماسى بار، ونىڭ ىشىندە جابدىقتالعاندارى – 51،1 مىڭ توننا. بيىل قوسىمشا 2 كوكونىس قويماسىن پايدالانۋعا بەرۋ جوسپارلانىپ وتىر.
سونىمەن قاتار بقو-دا 33،5 مىڭ مال باسىنا ارنالعان 14 بورداقىلاۋ الاڭى جۇمىس ىستەيدى، ولار بارلىق قاجەتتى ينفراقۇرىلىممەن جابدىقتالعان. بيىل سىيىمدىلىعى 17،4 مىڭ باس بولاتىن تاعى 7 مال بورداقىلاۋ الاڭىن ىسكە قوسۋ جوسپارلانىپ وتىر. سونداي-اق 1،9 مىڭ مال باسىنا ارنالعان 4 ءىرى ءسۇت فەرماسىنىڭ قۇرىلىسى باستالدى. ناتيجەسىندە وبلىستا ءسۇت ءوندىرىسى 41،2 مىڭ تونناعا جەتەدى.
جالپى، وتكەن جىلدىڭ قورىتىندىسى بويىنشا اۋىل شارۋاشىلىعى ونىمدەرىنىڭ وڭدەلگەن ۇلەسى 63،1%-عا جەتسە، 2026 جىلعا قاراي بۇل كورسەتكىشتى 70%-عا دەيىن ارتتىرۋ جوسپارلانعان. بۇگىنگى تاڭدا جەرگىلىكتى ازىق-تۇلىكپەن قامتاماسىز ەتۋ نەگىزگى ازىق-تۇلىك تاۋارلارىنىڭ 24 اتاۋى بويىنشا جۇزەگە اسىرىلادى. بۇل باعىتتاعى جۇمىستار ەرەكشە باقىلاۋدا.