بەيسەن قۇرانبەك اتىنداعى «جىگەر» سىيلىعىنا وتىنىمدەر قابىلدانادى

«جىگەر» - جۋرناليستىك شەبەرلىك سالاسىندا الەۋمەتتىك ماڭىزى بار تاقىرىپتاردى جاريالاعانى ءۇشىن بەرىلەتىن كاسىبي سىيلىق.

قازاقستان رەسپۋبليكاسى اقپارات جانە قوعامدىق دامۋ مينيسترلىگى تانىمال قازاقستاندىق تەلەجۋرناليست بەيسەن قۇرانبەك اتىنداعى «جىگەر» سىيلىعىنا وتىنىمدەر قابىلداۋدىڭ باستالعانى تۋرالى مالىمدەدى، دەپ حابارلايدى Almaty-akshamy.kz 

بايقاۋ «مەديا دامىتۋ قورى» كورپوراتيۆتىك قورىمەن ىنتىماقتاستىقتا جۇرگىزىلەدى.

«جىگەر» سىيلىعىنا وتىنىمدەردى قابىلداۋ 2021 جىلى 20 تامىزدان 20 قىركۇيەككە دەيىن «مەديا دامىتۋ قورى» كورپوراتيۆتىك قورىنىڭ mdq.kz رەسمي سايتىندا جۇزەگە اسىرىلادى.

سىيلىقتىڭ نەگىزگى ماقساتى – تالانتتى جۋرناليست، قوعام قايراتكەرى، قازاقستان رەسپۋبليكاسى پرەزيدەنتى سىيلىعىنىڭ لاۋرەاتى بەيسەن قۇرانبەكتىڭ ەسىمىن ەل جادىندا وشىرمەۋ، مۇراسىن ساقتاپ قالۋ. 

كونكۋرسقا قاتىسۋ شارتتارى:

كونكۋرسقا قازاقستان رەسپۋبليكاسىنىڭ رەسپۋبليكالىق جانە وبلىستىق تەلەباعدارلامالارى قاتىسا الادى؛
كونكۋرسقا ۇسىنىلعان ماتەريالدار تەلەەفيردە 2021 جىلدىڭ 1 قاڭتارى مەن 19 قىركۇيەك ارالىعىندا كورسەتىلۋى ءتيىس؛
كونكۋرسقا قازاق جانە ورىس تىلدەرىندەگى جۇمىستار قابىلدانادى؛
كونكۋرسقا قوعام ءۇشىن وزەكتى ماسەلەلەردى جانە الەۋمەتتىك تاقىرىپتى قوزعايتىن تەلەباعدارلامالار قاتىسا الادى.

بايقاۋ جەڭىمپازدارى «جىگەر» ەستەلىك مۇسىنشەسىنىڭ، ديپلومنىڭ جانە قارجىلاي سىيلىقتىڭ يەگەرى اتانادى.

 I ورىن ءۇشىن - 1 000 000 تەڭگە، II ورىن ءۇشىن - 500 000 تەڭگە جانە III ورىن ءۇشىن - 300 000 تەڭگە.

بايقاۋ قورىتىندىسى مەن جەڭىمپازدار ەسىمدەرى 2021 جىلدىڭ 27 قىركۇيەگىندە بەلگىلى بولادى.