بەيجىڭ تۇرعىندارى وليمپيادا كادەسىيلارىن ساتىپ الۋ ءۇشىن ۇزىن-سونار كەزەككە تۇرۋعا ءماجبۇر. الايدا بارىنە جەتەتىن ءتۇرى جوق، دەپ حابارلايدى اlmaty-akshamy.kz «حابار 24»-كە سىلتەمە جاساپ.
قىسقى ويىنداردىڭ باستالعانىنا ءالى ءبىر اپتا وتكەن جوق، الايدا شاھاردا كادەسىيلار تاۋسىلا باستادى. جۇرت دۇكەن سورەلەرىندە تۇرعان زاتتاردىڭ تۇگەلىن ساتىپ الىپ جاتىر. جۇڭگو تاريحىنداعى تۇڭعىش قىسقى وليمپيادا – جەرگىلىكتى تۇرعىنداردىڭ ماقتانىشى. كوبى جارىستى ءوز كوزىمەن كورگىسى كەلدى. الايدا پاندەميانىڭ كەسىرىنەن ونداي مۇمكىندىكتەرى بولماعاندىقتان، كادەسىيلاردى جاپپاي ساتىپ الىپ جاتىر.
ۇيىمداستىرۋشىلار بۇيىمداردىڭ 5 مىڭداي ءتۇرىن دايىنداعان. بەيجىڭ ورتالىعىنداعى تەك ءبىر رەسمي دۇكەننىڭ كۇندەلىكتى ساۋداسى 150 مىڭ دوللاردان اسىپ ءتۇستى. الايدا سۇرانىس تىم جوعارى. وليمپيادادان ەستەلىك الىپ قالعىسى كەلەتىندەر ۇزىن-سونار كەزەكتە تۇرۋعا ءماجبۇر. كۇن سالقىن بولعاندىقتان، ولارعا تەگىن شاي دا ۇلەستىرىلۋدە.
رەسمي دۇكەندەردىڭ ەلەكتروندى پلاتفورمالارىندا تاپسىرىس جاساۋعا بولادى. ءبىراق تاۋاردى ءبىر ايداي كۇتۋ كەرەك.
ايتا كەتۋ كەرەك، بۇل ويىندار جەرگىلىكتى تۇرعىنداردىڭ سالاۋاتتى ءومىر سۇرۋگە قۇلشىنىسىن ارتتىردى. ۇكىمەت وكىلدەرىنىڭ مالىمدەۋىنشە، 300 ميليوننان اسا ادام قىسقى سپورت تۇرلەرىمەن اينالىسا باستاعان.