جۋىردا اق وليمپيادا ويىندارىنا ارنالعان بارلىق ىرىكتەۋ جانە رەيتينگتىك دودالار اياقتالىپ، باسىم بولىگى ۇلەستىرىلدى
ۇلتتىق وليمپيادالىق كوميتەتتىڭ دەرەگىنشە، قازاقستاندىق اتلەتتەر سپورتتىڭ 8 تۇرىنەن 82 جولداماعا قول جەتكىزدى، دەپ حابارلايدى Almaty-akshamy.kz
شاڭعى جارىسى بويىنشا 30 جولداما قورجىندا. فريستايلشىلار توعىز جولداماعا يە بولعان. سونىڭ ىشىندە موگۋل بويىنشا – 5، اكروباتيكا بويىنشا 4 جولداما بار. كونكيشىلەر مەن بياتلونشىلار – 12، شورت-ترەكشىلەر توعىز جولدامانى قورجىنعا سالدى.
تاۋ شاڭعىسى مەن شاڭعىمەن تۇعىردان سەكىرۋ سپورتىنان ەل قۇرامالارى ءتورت جولدامادان ەنشىلەسە، شاڭعى قوسسايىسىنان وتاندىق سپورتشىلار ەكى ليسەنزياعا يەلىك ەتتى.
بۇگىنگى تاڭدا وليمپيادالىق قۇراما ساپىنا 32 سپورتشى ەندى. ايتا كەتەرلىگى، بۇل سپورتشىلاردىڭ سوڭعى ءارى ناقتى سانى ەمەس. سەبەبى ۇوك كەيبىر سپورت تۇرلەرىنەن حالىقارالىق فەدەراسيالاردىڭ ليسەنزيالاردى قايتا ءبولۋ، ۇلەستىرۋ ناتيجەلەرىن كۇتۋدە. اتاپ ايتقاندا، بياتلون، شاڭعى جارىسى، موگۋل جانە اكروباتيكادان تاعى دا جولدامالار ۇيلەستىرىلۋى مۇمكىن. وليمپيادا ويىندارىنا قاتىساتىن سپورتشىلاردىڭ سوڭعى ءارى ناقتى ءتىزىمى 20 قاڭتاردان كەيىن بەلگىلى بولادى.
18 قاڭتار كۇنى مادەنيەت جانە سپورت ءمينيسترى داۋرەن ابايەۆ XXIV قىسقى وليمپيادا ويىندارىنىڭ دايىندىعى جايىندا جيىن وتكىزدى. مينيستر الداعى قىسقى وليمپيادا ويىندارىندا ۇلتتىق قۇرامانىڭ الدىندا تۇرعان ءبىرقاتار مىندەتتەرگە توقتالدى.
«ەل ءۇشىن قازىرگى قيىن جاعدايدا، سونىڭ ىشىندە كوروناۆيرۋستىق ينفەكسيانىڭ كوبەيۋى كەزىندە ءبىز سپورتشىلارىمىزعا الداعى وليمپيادادا دوپينگسىز، جانجالسىز، لايىقتى ونەر كورسەتۋ مىندەتىن قويدىق. ارينە، ءاربىر سپورتشى جەتىستىكتىڭ شىڭى سانالعان وليمپيادا مەدالىنە ۇمتىلادى. ال ءبىز وليمپياداشىلارىمىزدىڭ كەز كەلگەن جەتىستىگىنە قۋانامىز. بۇل ءۇشىن مەملەكەت قولدان كەلگەننىڭ بارلىعىن جاساپ، سپورتشىلاردى دايىنداۋ، ساپالى جاتتىعۋ، وقۋ-جاتتىعۋ جيىندارى جانە ىرىكتەۋ جارىستارىنا قاتىسۋ قارجىلاندىرىلدى»، - دەدى مادەنيەت جانە سپورت ءمينيسترى.
«بۇگىنگى كۇننىڭ باستى مىندەتى – سپورتشىلار مەن جاتتىقتىرۋشىلار دەنساۋلىعى مەن قاۋىپسىزدىگىن ساقتاۋ. ولاردىڭ كوپشىلىگى، ياعني ىرىكتەۋ تۋرنيرلەرىن اياقتاعاندار سوڭعى اپتا بويى جابىق كارانتيندىك ايماقتاردا ورنالاستى. وندا دايىندىقتىڭ سوڭعى كەزەڭى ءجۇرىپ جاتىر. الەمدىك دودالار اياقتالعان سوڭ بەيجىڭگە ۇشپاس بۇرىن سپورتشىلار كارانتيندە ۋاقىت وتكىزەدى. بارلىق سپورتشىلار كەشەندى-عىلىمي توپ ماماندارىنىڭ ۇزدىكسىز باقىلاۋىندا. مادەنيەت جانە سپورت مينيسترلىگى مەن ۇوك سپورتتىق جارىس كۇنتىزبە بويىنشا دودالارعا قاتىسۋ، دايىندىق جۇمىستارى، شەتەلدىك وقۋ-جاتتىعۋ جيىندارى مەن جارىستار، ونىڭ ىشىندە ەلىمىزدەگى حالىقارالىق جارىستارعا قاتىسۋ ءۇشىن كوماندالارعا بارلىق جاعدايدى جاسادى. ەندى سپورتشىلار ەڭ جاۋاپتى كەزەڭگە اياق باسىپ وتىر. قازاقستان حالقى ءبىزدىڭ كوماندانى قولدايتىنىنا سەنىمدىمىز»، - دەيدى ۇوك باس حاتشىسى اندرەي كريۋكوۆ.
ايتا كەتەرلىگى، وليمپيادا ويىندارىنىڭ بارلىق قاتىسۋشىلارىنىڭ قوزعالىسى قاتىسۋشىلاردىڭ دەنساۋلىعىنا ءقاۋىپ توندىرمەۋ جانە الدىن الۋ ماقساتىندا ارنايى باسشىلىقپەن قاتاڭ تۇردە بەكىتىلگەن تالاپتار مەن قاعيداتتار جيىنتىعىنان تۇراتىن نۇسقاۋلىق پلەيبۋكپەن رەتتەلەدى. تەك وليمپيادا ويىندارى كەزىندە ەمەس، بۇل نۇسقاۋلىق قىتايمەن شەكارادان وتەر الدىندا دا قاتاڭ تۇردە رەتتەلەدى.
ويىن كەزىندە وليمپيادا اۋىلىنىڭ تۇرعىندارىنان كۇن سايىن پتر تەست الىنىپ، دەنساۋلىعى تەكسەرىلىپ، جازداعى توكيو وليمپياداسىنىڭ ۇلگىسى بويىنشا قاتىسۋشىلاردىڭ ورنالاسقان جەرى ارنايى تەلەفون قوسىمشاسى ارقىلى باقىلانادى.
قازاقستان قۇراماسى 27 قاڭتار كۇنى چارتەرلىك «Air Astana» رەيسىمەن نۇر-سۇلتاننان الماتى ارقىلى بەيجىڭگە اتتانادى. ايتا كەتەرلىگى، قازاقستان قۇراماسىنىڭ وليمپيادالىق فورماسىنىڭ تانىستىرىلىمى 20 قاڭتارعا جوسپارلانعان.
قىسقى وليمپيادا ويىندارى 4 اقپان كۇنى باستالادى جانە ءتورتجىلدىقتىڭ باستى باسەكەسىندە 109 مەدال جيىنتىعى ساراپقا سالىنادى.